Janar-jaǵarmai naryǵyndaǵy ónimsiz deldaldardyń sany azaitylady. Bul týraly Úkimet otyrysynda QR Ulttyq ekonomika ministri Álibek Qýantyrov aitty, dep habarlaidy QazAqparat.
«Memleket basshysynyń tapsyrmasymen ministrlik baǵanyń ósýine jol bermeý maqsatynda múddeli memlekettik organdarmen birlesip, 2022-2024 jyldarǵa arnalǵan infliatsiiany baqylaý jáne tómendetý boiynsha is-sharalar keshenin ázirledi. Ol ónim óndirý kólemin ulǵaitýǵa, saqtaý men logistikaǵa, bólshek saýdaǵa, baǵa belgileýdi baqylaýǵa, monopoliiaǵa qarsy jáne syrtqy saýdany retteýge baǵyttalǵan jedel jáne orta merzimdi sipattaǵy 61 is-sharadan turady. Infliatsiiany baqylaý jáne tómendetý boiynsha sharalar keshenin iske asyrýdyń maqsaty – infliatsiiany 2022 jyly 4-6 paiyz dálizinde ustap turý jáne ony 2025 jylǵa qarai 3-4 paiyz deńgeige deiin tómendetý», - dedi ministr.
Onyń atap ótýinshe, bul is-sharalar Azyq-túlik qaýipsizdigin qamtamasyz etý josparyn qabyldaýdy, turaqtandyrý qorlarynyń júktemesin qamtamasyz etýdi, áleýmettik mańyzy bar azyq-túlik taýarlaryn ótkizýshiler úshin jaldaý aqysyn tómendetýdi, áleýmettik mańyzy bar azyq-túlik taýarlary, janar-jaǵarmai, kómir, elektr energiiasy, dárilik preparattar jáne taǵy basqalarǵa baǵalardyń ósýin tejeýdi qamtidy.
«Júieli is-sharalar aiasynda janar-jaǵarmai naryǵyndaǵy ónimsiz deldaldardyń sanyn azaitý josparlanýda. Halyqtyń áleýmettik osal toptaryn qoldaý maqsatynda olardy kommýnaldyq tólemderdi tóleý kezinde jeke topqa bólý praktikasy engiziletin bolady», - dedi Álibek Qýantyrov.
