16 qazanda Mańǵystaý oblysy Jańaózen qalasynda dástúrli sadaq atýdan tuńǵysh respýblikalyq chempionat ótti, dep habarlaidy "Ult aqparat".
Chempionattyń maqsaty – dástúrli sadaq atý ónerin nasihattaý, iaǵni ony qazaqtyń ulttyq sporttyq óneri retinde damytý.
Chempionat Qazaqstan Respýblikasynyń Ulttyq sport túrleri qaýymdastyǵy men Dástúrli sadaq atý federatsiiasynyń uiymdastyrýymen ótti.
Tuńǵysh respýblikalyq chempionatqa Qazaqstannyń barlyq óńirlerinen 170-ke jýyq sportshy qatysty. Chempionat jasóspirimder (7-17 jas aralyǵy), jastar (18-24) jáne eresekter (+24) arasynda ótti. Erler men áielder kategoriiasy bólek.
Sadaqshylar 10 metrden 75 metrge deiingi qashyqtyqqa arnalǵan Olimp, Jamby, Pýta, Qyrǵyz (Orta Aziia), Qazaq (Jamby) degen nysana túrleri boiynsha mergendik sheberlikterin synasty.
Jalpy komandalyq esepte birinshi oryndy Shymkent qalasynyń quramasy enshilep, 1 mln teńge kóleminde júldeaqy aldy. Ekinshi jáne úshinshi oryndardy Abai jáne Jetisý oblystarynyń komandalary aldy.
Jeke esepte árbir formatta bir-bir jeńimpazdan anyqtalyp, árqaisysy 100 000 teńge kóleminde júldeaqyǵa qol jetkizdi.
Tuńǵysh ret uiymdastyrylyp otyrǵan respýblikalyq chempionattyń jalpy júlde qory 9 750 000 teńgeni qurady.
Sadaq – beibit zamanda ańshylyqtyń, jaýgershilik zamanda – qorǵanystyń quraly bolǵan. Al 19 ǵasyrdan bastap sadaq atý sporttyq ónerge ainaldy. Biyldan bastap Qazaqstanda dástúrli sadaq atý sport túri retinde resmi túrde bekitildi.
