Jańa Zelandiianyń Kraistcherch qalasynda eki meshitte bolǵan shabýylǵa bailanysty qozǵalǵan qylmystyq istegi basty kúdikti 16 naýryzda aimaqtyq sotqa jetkizilgen. Ózin "aq násildi ultshyl" dep ataityn Avstraliia azamaty 28 jastaǵy Brenton Tarrantty qarýlanǵan eki politsiia qyzmetkeri sot ǵimaratyna aparǵan.
Sotta Tarrantqa "adam óltirý" baby boiynsha aiyp taǵylǵan. Qylmysqa qatysy bar dep kúdikke ilingen onyń taǵy eki "sybailasy" da ustalǵan dep habarlaidy "Amerika daýysy" saity.
Senbi kúngi baspasóz máslihatynda Avstraliianyń premer-ministri Djasinda Ardern ustaý kezinde de Tarranttyń shabýyl jasaýǵa oqtalǵanyn aitqan. Premer-ministr qandy shabýyldy aiyptap, qarý ainalymy týraly jergilikti zańnamaǵa ózgeris engizý qajettigin málimdegen. Ardernniń aitýynsha, shabýyldaýshyda bes qarý bolǵan. Olardyń bárin zańdy túrde alǵan.
Aiyptalýshy shabýyl kezinde Facebook-ta tikelei transliatsiia jasaǵan. Ol áleýmettik jelide 74 bettik ulttyq manifestiń mátinin jariialaǵan. Onda musylmandardy aiyptap, migranttardy "jaýlap alýshy" dep ataǵan. Áleýmettik jelide Tarrant álemniń kez kelgen jeri qaýipsiz emes ekenin kórsetkisi kelgendikten shabýyldy Jańa Zelandiiada uiymdastyratynyn aitqan.
15 naýryzda Jańa Zelandiiadaǵy eki meshitke jasalǵan shabýyldan keminde 50 adam qaza taýyp, 20 adam jaralanǵan. El biligi oqiǵany terakt dep atady. Álem elderiniń jetekshileri Jańa Zelandiia halqyna kóńil aityp, shabýyldy qatań aiyptady.
