- QR Premer-Ministriniń orynbasary - Aýyl sharýashylyǵy ministri Asqar Myrzahmetov 2017-2021 jyldarǵa arnalǵan Agroónerkásip keshenin damytý baǵdarlamasyn tanystyrdy, dep xabarlaidy QazAqparat tilshisi Úkimet úiinen.
Baǵdarlama aiasynda astyq alqaptarynyń kólemin 2,3 mln. gektarǵa azaitý josparlanǵan. Osynyń nátijesinde jyl saiyn 3 mln. tonnaǵa az bidai jinalatyn bolady. Sebebi búginde elimizde 2,9 mln. tonna bidai artyǵymen qalyp otyrady. Endi, sonyń ornyna maily daqyldardy kóptep ósirý kózdelip otyr. Óitkeni osy sanattaǵy ónimderdiń tapshylyǵy bar. Máselen, arpa (1,2 mln. tonna), qant qyzylshasy (1 mln. tonnaǵa jýyq), júgeri jáne taǵy basqa dándi-daqyldarǵa suranys joǵary bolyp tur. Sonyń barlyǵy syrttan jetkiziledi. Al jańa baǵdarlama aiasynda atalǵan ónimderdi ózimizde óndirip, ishki naryqty barynsha toltyrý josparlanǵan. Budan bólek, et pen sút óndirisin damytý jumysyna basa nazar aýdarylady. Ol úshin aýyldy jerlerde kooperativterdi kóptep ashý josparlanǵan.
"Búgingi tańda aýyl sharýashylyǵy ónimderiniń 70-90 paiyzy qosalqy sharýashylyqtarda óndiriledi. Al ol ónimniń bári zaýyttarǵa jetkizilmeidi. Sonyń saldarynan qaita óńdeý kórsetkishi 30 paiyzdan aspai otyr. Máselen, qazir elimizde 400-den astam qaita óńdeitin kásiporyn bar. Olardyń barlyǵy tek 20-60 paiyzǵa ǵana jumys istep tur. Sondyqtan jańa baǵdarlama aiasynda qaita óńdeýdi ulǵaityp, ishki naryqty daiyn ónimdermen barynsha toltyrý josparlanyp otyr. Ol úshin respýblika boiynsha 1200 kooperativ qurylady. Olar qaita óńdeýge qajetti ónimdi daiarlaityn bolady. Bizdiń esebimizge sáikes, osy sharalardyń arqasynda aýyl xalqy óz ónimderin satyp, shamamen 300 mlrd. teńge kóleminde tabys taba alady", - deidi A.Myrzaxmetov.
Onyń aitýynsha, jańa baǵdarlama aiasynda memleket mal sharýashylyǵy salasynyń tiimdiligin 40 paiyzǵa, al ósimdik sharýashylyǵyn 30 paiyzǵa deiin arttyrmaqshy.
Ministrler kabineti jańa baǵdarlamanyń engizilýin qoldady. Alaida resmi túrde maquldaǵan jón. Premer-Ministr B.Saǵyntaev atalǵan qujatty tolyǵymen pysyqtap, jeltoqsan aiynda maquldaýdy uiǵardy. "Jańa jyldan bastap biz jańa baǵdarlama boiynsha jumys isteýimiz kerek",- dedi ol.
.jpeg)