"Qazaqstan halqyna" qorynyń basshysy Bolat Jámishev qor qyzmetkerleriniń jalaqysy qansha ekenin aitty, dep habarlaidy Sputnik Qazaqstan.
Ol qamqorshylyq keńestiń músheleri (Jámishevtiń ózi de) qorda tegin negizde jumys isteitinin málimdedi. Bas-aiaǵy 24 adamdy quraityn atqarý keńesiniń músheleri orta eseppen 587 myń teńge jalaqy alady.
Alaida qyzmetkerler qolyna alatyn naqty soma budan birshama az. Óitkeni atalǵan jalaqy mólsherinen mindetti alymdar men salyq shegeriledi. Jalaqy tólenetin qarajat bank depozitteriniń syiaqylary esebinen qarastyrylyp jatyr.
Búginde qorǵa 117 milliard teńgeden astam qarajat túskenin atap ótý kerek.
"Demeýshilerdiń jalaqymen qamtamasyz etýine qarsymyz. Sebebi jalaqy táýelsiz bolýy kerek. Ony qor ózi tóleýge tiis", - dedi Jámishev Armanjan Baitasovqa bergen suhbatynda.
Ol bireýler 587 myń teńgeni tym joǵary jalaqy dep sanaýy múmkin ekenin aitty.
"Alaida bul eldegi ortalyq memlekettik organdardaǵy ákimshilik qyzmetkerlerdiń eńbekaqysymen birdei. Biz búkil ministrlikke qarama-qarsy joldyń betinde otyrmyz. Sondyqtan ákimshilik memlekettik qyzmetkerlerdikimen teń bolatyn jalaqy usynbasaq, eshkim bizge jumysqa kelmeidi. Sondai-aq, memlekettik organdarda syiaqy qarastyrylsa, biz biýdjetke syiaqy engizgen joqpyz", - dedi ol.
Jámishev qor qarajatty barynsha únemdeýge tyrysatynyn málimdedi. Máselen, túrli kompaniialar keńse, kompiýterler, avtokólik, elektrondy qujat ainalymyna arnalǵan portal men júieni tegin usynǵan.
