8 sáýirde "Qazatomónerkásip" ulttyq kompaniiasynyń burynǵy jetekshisi, jaqynda túrmeden shyqqan Muhtar Jákishev Facebook-ta tikelei efirge shyǵyp, qoldanýshylardyń suraqtaryna jaýap berdi. Ol bostandyqtaǵy alǵashqy birneshe aptanyń qalai ótkenin aityp, áserimen bólisti, dep jazady Azattyq.
Efir basynda túrmede otyrǵan kezde ózin qoldaǵan azamattarǵa alǵys aityp, kelgen hattar "súzgiden ótkendikten" jaýap berýge múmkindigi bolmaǵanyn jetkizdi.
11 jyldan keiin birinshi ret otbasymen qaýyshqan Jákishev balalarynyń "óz pikiri qalyptasqan eresek azamat" bolǵanyn kórip qýanǵanyn aitty. Biraq Shveitsariiadaǵy úlken qyzyn karantinge bailanysty kóre almaǵanyn jetkizdi.
Ol túrmeden shyqqannan keiin birinshi kúni anasynyń qabirine barǵan.
"Anam ákemniń janyna jerlengen eken. Qabir basynda bir jarym saǵat turdym. Ózimdi jalǵyz qaldyryp ketýdi suradym. Sebebi meniń aitatynym kóp edi. Ata-anam meni estitin shyǵar dep úmittenemin" dedi Jákishev efir kezinde.
2018 jyly qyrkúiek aiynda Jákishevtiń anasy aýyr syrqattanyp, kóz jumǵan bolatyn. Túrmede bolǵan Jákishevke qylmystyq atqarý júiesi komiteti anasynyń jerleý rásimine qatysýyna ruqsat bermegen.
8 sáýirde tikelei efir kezinde Jákishev karantinge bailanysty tolyq meditsinalyq tekserýden óte almaǵanyn, karantinniń aiaqtalýyn kútip júrgenin aitty.
"Dárigerler rastasa, aýrýdy jeńem degen úlken úmitim bar. Eger aiyqsam, aldaǵy ýaqytta ózimdi mamanymyn dep esepteitin jáne qyzyǵatyn sala - jumys oryndary men kásiporyn ashýǵa kúsh salamyn" dedi ol.
Ol el ekonomikasyna bailanysty suraqtarǵa tereń jaýap bere almaitynyn, sebebi qolynda aqparaty joǵyn jáne bar aqparatty saraptap úlgermegenin jetkizdi.
"Kúnine eki saǵattan artyq jumys istesem, qan qysymym kóterilip ketedi" dedi Jákishev.
Aldaǵy jospary týraly suraqqa "bári densaýlyǵyma bailanysty" dep jaýap berdi. Ol aldaǵy ýaqytta osylaisha tikelei efirge shyǵyp turýy múmkin ekenin aitty.
Tikelei efir kezinde Jákishev atom energetikasy, karantin, ǵalamdyq daǵdarys siiaqty máselelerdi sholyp ótti.
Aita keteiik, 19 naýryzda "Qazatomónerkásip" ulttyq kompaniiasynyń burynǵy basshysy Muhtar Jákishev shartty jazamen bostandyqqa shyqqan edi.
2009 jyly Qazaqstan soty Muhtar Jákishevti jemqorlyq qylmysyn jasaǵan degen aiyppen 14 jylǵa túrmege qamaýǵa úkim etken.
