Alashorda kósemderiniń biri Jahansha Dosmuhamedovtiń Máskeýdegi Býtovo poligonynda jerlengeni belgili boldy. Bul týraly Alashorda qozǵalysynyń 100 jyldyǵyna orai Jympity-Máskeý baǵytynda uiymdastyrylǵan ekspeditsiia múshesi, Batys Qazaqstan innovatsiialyq-tehnologiialyq ýniversitetiniń professory, tarih ǵylymdarynyń kandidaty Dámetken Súleimenova málim etti, dep habarlaidy «QazAqparat» tilshisi.
Onyń aitýynsha, Býtovo buryn qalanyń shetinde bolsa, qazir Máskeýdiń ishinde qalǵan. Munda alty úlken qorymda saiasi qýǵyn-súrgin jyldary jazyqsyz atylǵan 20761 adam jerlengen. Osyndaǵy ǵibadathananyń basshysy Kirill Kaleda ákei Resei úkimetiniń qoldaýymen 1997 jyldan beri tynbai eńbektenip, Býtovo poligonynda jerlengen myńnan astam saiasi qýǵyn-súrgin qurbandarynyń aty-jónin anyqtap, birneshe kitap shyǵarǵan. Sonyń 3-tomynyń 82-betinde J.Dosmuhamedov týraly da málimet berilgen. Iaǵni 1938 jyly 3 tamyz kúni atylǵan 120 adamnyń ishinde Jahansha da bar. Býtovodaǵy qyrǵyn 1937 jyly 8 tamyzda bastalyp, 1938 jyldyń qarashasyna deiin jalǵasqan. Máiitterdi qalai bolsa solai kóme bergen. Mysaly, 12 sharshy metrdiń jerdiń ózinen 149 adamnyń súiegi shyqqan.
«Qazirgi kezde Býtovo poligonyndaǵy mármár taqtaǵa osynda qurban bolǵandardyń aty-jónderi jazylýda. Osy mármár taqtada Jahansha Dosmuhamedovtiń aty-jóni, atylǵan kúni tolyqtai jazylǵan. Olar Jahanshanyń kim ekenin bilmese de, tizimge kirgizgen. Býtovodaǵy qorymǵa elden aparǵan bir ýys topyraqty saldyq. Bir ýys topyraqty alyp keldik. Máskeý saparynda sondai-aq 1906-1910 jyldary Jahansha bilim alyp, zańger mamandyǵyn alyp shyqqan ǵimaratta (qazir munda M.Lomonosov atyndaǵy MMÝ-dyń filialy Aziia jáne Afrika elderi institýty ornalasqan), Dosmuhamedovter otbasy turǵan úide, Alashorda kósemi Álihan Bókeihanov jerlengen Don ziratynda boldyq. Alǵan áserimiz mol, keiinirek tolyq jazatyn bolamyz», dedi «QazAqparat» tilshisine alashtanýshy Dámetken Súleimenova.
