"Almaty" telearnasynyń málimetinshe, Inessa Zotova 13 jyldan beri qarttar úiinde turady. Kezinde laýazymdy qyzmet atqaryp, zeinetke shyqqan. Qazir ortalyqtyń jumysyna da belsene arlasyp, qarttardyń quqyǵyn qorǵaǵym keledi deidi. Ol ortalyq zeinetaqynyń 70 paiyzyn memlekettik mekeme alyp qalatynyn aitady.
"Dári-dármekke tapsyrysty qańtarda bergenbiz, naýryzda keldi. Qart kisi bolǵan soń aiaq qaqsaidy, túrli jaqpa mailar kerek. Ony ózimiz satyp alýǵa májbúrmiz", - dedi "Shańyraq" áleýmettik ortalyǵynyń turǵyny Inessa Zotova.
Zeinetkerler dári-dármekti kútip qalatyn kezder bolady deidi. Jalpy, 262 turǵyny bar áleýmettik ortalyqta 79 múmkindigi shekteýli qart kisi bar. Mundaǵy meditsinalyq qyzmetkerlerdiń sózinshe, olar dárige muqtaj emes, biraq asa kútimdi qajet etedi.
Telearna málimetinshe, bul áleýmettik ortalyqta 2002 jyldan beri turyp kele jatqan Adasgúl Aqqulova máseleniń túiinin tenderdi joiý arqyly sheshýge bolatynyn aitady.
"Tenderdi kim oilap tapty? Ony joiý kerek. Árine, ol úshin tiisti mekemege hat joldaý kerek", - dedi zeinetker Adasgúl Aqqulova.
Al ortalyqtyń jańa taǵaiyndalǵan direktory qordalanǵan máselelerdi sheship jatqanyn aitty.
"Meniń kelgenime tórt ai boldy. Ata-ájeler burynǵy máselelerdi qaita kóterip, shaǵym aityp jatyr. Qazir másele joq", - dedi "Shańyraq" áleýmettik qyzmet ortalyǵynyń direktory Turarbek Tumanshiev.
"Meditsinalyq áleýmettik qyzmettik mekemede 1-3 ai ýaqyt bolmasa, onyń aqshasyn ustaý zańda qarastyrylmaǵan. Biz ministrlikke hat joldadyq", – dedi qalalyq áleýmettik qyzmet kórsetý ortalyǵynyń bas mamany Aiazbi Kablan.
