Qazaqstannyń Ishki ister ministrligi jasóspirimderge áleýmettik jelilerdi qaýipsiz paidalaný jóninde mańyzdy eskertý jasady. Vedomstvo internettegi qaýipsizdik qarapaiym erejelerdi saqtaýdan bastalatynyn atap ótti, dep habarlaidy ult.kz.
IIM málimetinshe, áleýmettik jeliler qarym-qatynas jasaýǵa, bilim alýǵa jáne ómirdegi mańyzdy sáttermen bólisýge múmkindik beredi. Alaida jeke ómirge qatysty málimetterdi ashyq jariialaý túrli qaýipke ákelýi múmkin.
Osyǵan bailanysty ministrlik jasóspirimderge mynadai keńester berdi:
Úi mekenjaiyn, telefon nómirin, oqityn mektebin, sabaq kestesin jáne beitanys adamdarǵa ornalasqan jerińizdi anyqtaýǵa kómektesetin basqa da jeke málimetterdi jariialamańyz.
Geolokatsiiasy qosylǵan foto men storisti naqty ýaqyt rejiminde salmańyz. Mundai jazbalardy ol jerden ketkennen keiin ǵana bólisken durys.
Dostar qataryna tek ózińiz jeke tanityn adamdardy ǵana qosyńyz.
Akkaýntyńyzdyń qupiialyq baptaýlaryn rettep, jariialanymdaryńyzdy tek senimdi adamdar kóre alatyndai etińiz.
Eger beitanys adam jeke suraqtar qoiyp, kúmándi áreket tanytsa nemese qorqytýǵa tyryssa, onymen bailanysty dereý toqtatyp, akkaýntyn buǵattańyz.
IIM ókilderi eń bastysy – qaýipsizdik ekenin eske saldy.
«Esterińizde bolsyn: sizdiń qaýipsizdigińiz jazylýshylar men laiktar sanynan áldeqaida mańyzdy. Tsifrlyq ortadaǵy jaýapty minez-qulyq jeke derekterińizdi qorǵap, túrli qaýiptiń aldyn alýǵa kómektesedi», – dep málimdedi vedomstvo.
