Ýkraina prezidenti Vladimir Zelenskii "Reseidiń Ýkrainanyń energetikalyq infrastrýktýralaryn atqylap, halyqty jylý men jaryqtan ajyratý taktikasy Ýkrainanyń rýhyn syndyra almaidy" dedi.
Ol britaniialyq Financial Times basylymyna bergen suhbatynda "Ýkrainanyń soǵystaǵy maqsaty – Resei okkýpatsiialap alǵan jerlerin, sonyń ishinde Qyrymdy da qaitarý" dep málimdedi.
"Biz búkil jerimizdi qaitarýymyz kerek, sebebi, meniń oiymsha, maidan – diplomatiia bolmaǵandaǵy jol. Eger jerińizdi qaitara almasańyz, onda soǵys tolyq toqtamaǵany" - dedi Zelenskii suhbatynda.
Ýkraina basshysy Qyrymǵa qatysty suraqqa "Eger kimde-kim bizge Qyrymdy áskeri jolmen azat etýdi usynsa, men qoldaimyn" dei kele, "kimde-kim beibitshilik úshin Qyrymdy Reseide qaldyrýdy usynsa, bul usynysty Ýkraina qabyldamaidy" degendi meńzedi.
"Eshkim mundai usynysty aityp, ýaqyt joǵaltpai-aq qoisyn" dedi ol.
Buǵan deiin basylymdar AQSh prezidentiniń ulttyq qaýipsizdik boiynsha keńesshisi Djeik Sallivan Ýkraina biligin Qyrymdy qaitaryp alý oiynan qaitýdy usynǵanyn jazǵan. Biraq bul týraly resmi aqparat bolmady.
Resei Ýkrainaǵa soǵys ashpai turyp, Ýkraina Qyrymdy qaitarý úshin áskeri operatsiia bastaityny jaily resmi málimdeme jasamaǵan edi. Keiin soǵys bastalǵan soń Kievtiń resmi pozitsiiasy ózgerip, Ýkraina biligi okkýpatsiialanǵan jerlerin qaitarsa ǵana, Reseimen beibit kelisimge keletinin birneshe ret málimdegen.
Keiingi ýaqytta Resei Ýkrainanyń infrastrýktýralaryna raketamen shabýyldaýdy jiiletti. 23 qarashadaǵy jappai jasalǵan shabýyldan soń eldiń biraz bóligi jaryqsyz qaldy.
