Ýkraina prezidenti Vladimir Zelenskii Ýkrainanyń Qazaqstandaǵy elshisi Petr Vrýblevskiidi qyzmetinen bosatty. Zelenskii qol qoiǵan jarlyq Prezident keńsesiniń saitynda jariialandy.
"Petr Iýrevich Vrýblevskii Ýkrainanyń Qazaqstan Respýblikasyndaǵy tótenshe jáne ókiletti elshisi qyzmetinen bosatylsyn", - delingen jarlyq mátininde.
Eske sala keteiik, buǵan deiin birqatar BAQ Ýkraina elshisi Petr Vrýblevskiidiń qazaqstandyq bloger Dias Quzaiyrǵa bergen suhbatynan úzindi taratqan bolatyn. Onda diplomat "orystardy neǵurlym kóp óltirsek, balalarymyzdyń qoly qanǵa soǵurlym azyraq malynady" degen edi.
Keiinirek Vrýblevskii Qazaqstannyń Cyrtqy ister ministrligine shaqyryldy, vedomstvo onyń málimdemesine narazylyq bildirdi. Sodan soń Ýkraina elshisi Qazaqstannan keshirim surady.
Aita keteiik, Petr Vrýblevskii 1970 jyly 15 shildede dúniege kelgen. Taras Shevchenko atyndaǵy Kiev ulttyq ýniversitetiniń halyqaralyq qatynastar institýtyn bitirgen.
Túrli quqyqtyq jáne qarjylyq qurylymdarda jumys istegen. 1997 jyldan diplomatiialyq qyzmette. Ýkrainanyń Indoneziiadaǵy, Tailandtaǵy, Vetnamdaǵy elshilikterinde jumys istegen. Sondai-aq, Ýkraina Prezidentiniń Hatshylyǵynda jáne premer-ministriniń Keńsesinde túrli qyzmetter atqarǵan.
Qazaqstandaǵy Elshi bolyp taǵaiyndalǵanǵa deiin Ýkrainanyń Belarýstegi elshiliginiń ministr keńesshisi qyzmetin atqarǵan.
