Biryńǵai jinaqtaýshy zeinetaqy qory (BJZQ) engizgen eń tómengi jetkiliktilik shegin esepteýdiń jańa ádistemesi zeinetaqy jinaǵyn merziminen buryn paidalana alatyn azamattardyń sanyn kúrt qysqartty. Endi belgilengen shekten joǵary jinaǵy barlardyń sany 30 myńnan sál ǵana asady, dep habarlaidy ult.kz.
Qordyń málimetinshe, jańa ádisteme engizilgenge deiin mundai múmkindikke shamamen 500 myń azamat ie bolǵan. Alaida esepteý tártibi qaita qaralǵannan keiin bul kórsetkish 16 eseden astam tómendegen.
Sońǵy derekterge sáikes, 2026 jyldyń 5–10 maýsymy aralyǵynda jetkiliktilik sheginiń ulǵaiýynan keiin turǵyn úi jaǵdaiyn jaqsartýǵa arnalǵan birjolǵy zeinetaqy tólemderi boiynsha nebári 52 ótinish oryndalǵan.
BJZQ eske salǵandai, 2021 jyldyń qańtarynan 2026 jyldyń 31 mamyryna deiin qazaqstandyqtar zeinetaqy jinaqtarynyń bir bóligin turǵyn úi satyp alýǵa jáne emdelýge merziminen buryn paidalaný múmkindigin keńinen qoldandy. Osy ýaqyt aralyǵynda bul quqyqty shamamen 1,5 million adam paidalanǵan. Onyń ishinde 950 myńǵa jýyq azamat turǵyn úi jaǵdaiyn jaqsartsa, 570 myńnan astam adam emdelý shyǵyndaryn ótegen.
Jalpy alǵanda, azamattar 5,8 trillion teńge kólemindegi zeinetaqy jinaǵyn paidalanǵan. Onyń 5 trillion teńgeden astamy jetkiliktilik sheginen asatyn qarajat bolsa, 4,8 trillion teńgeden astamy turǵyn úige, al shamamen 1 trillion teńgesi emdelýge jumsalǵan.
Aita keteiik, osy aidyń basynan bastap eń tómengi jetkiliktilik shegin esepteý tártibi jańartyldy. Endi esepteý kezinde salymshynyń jasy ǵana emes, zeinetke shyqqanǵa deiingi kezeńi, bolashaq zeinetaqy tólemderiniń kólemi, investitsiialyq tabys jáne basqa da uzaq merzimdi qarjylyq faktorlar eskeriledi.
