Astanada AI & Digital Bridge 2026 halyqaralyq forýmy aiasynda Prezident Qasym-Jomart Toqaev Ortalyq Aziiadaǵy alǵashqy AI-Enabled ýniversitet – Qazaq AI Research University-di resmi túrde ashty, dep habarlaidy ult.kz.
Memleket basshysy forým barysynda adam kapitalyn damytýǵa erekshe mán berdi. Onyń aitýynsha, zamanaýi derekter ortalyǵy men ozyq tehnologiialardyń bolýy ózdiginen tehnologiialyq serpiliske kepildik bermeidi. Ol úshin ǵalymdar, injenerler men kásipkerler qajet.
«Biz bilimdi, bilikti, jasampaz mamandar daiarlaityn ulttyq ǵylymi-injenerlik mektep qalyptastyrýymyz kerek. Osy oraida jańadan ashylǵan Qazaq AI Research University-ge airyqsha mindet júkteledi», – dedi Prezident.
Qasym-Jomart Toqaevtyń aitýynsha, ýniversitet tek maman daiarlaýmen shektelmei, óndiris pen ekonomikanyń suranysyna sai ǵylymi zertteýler júrgizýi kerek.
Osy maqsatta oqý ornynda AI+X modeli engizilip jatyr. Ol jasandy intellektini óndiris, energetika, meditsina, qarjy jáne memlekettik basqarý siiaqty naqty salalarda qoldanýǵa baǵyttalǵan.
Prezident jasandy intellekt adamnyń intellektýaldyq qabiletin almastyratyn qural emes, bilim alý úderisindegi kómekshi tásil bolýy kerek ekenin atap ótti.
Ýniversitette 528 stýdent bilim alyp jatyr
Ǵylym jáne joǵary bilim ministri Saiasat Nurbek ýniversitettiń qurylý barysy týraly baiandady.
Onyń málimetinshe, Qazaq AI Research University qurý týraly tapsyrma 2025 jylǵy 1 qazanda Jasandy intellektini damytý jónindegi keńestiń alǵashqy otyrysynda berilgen.
Ýniversitet 2026 jylǵy 29 sáýirde bilim berý qyzmetine memlekettik litsenziia alǵan. 15 mamyrda AI+X modeli boiynsha kadr daiarlaityn eksperimenttik alań mártebesine ie boldy. Al 18 mamyrda institýtsionaldyq akkreditteýden ótti.
1 qyrkúiekten bastap alǵashqy stýdentter qabyldandy. Qazir ýniversitette 528 adam bilim alyp jatyr. Onyń 294-i memlekettik grantpen oqidy.
Bakalavriatta stýdentter Artificial Intelligence and Machine Learning jáne Physical AI baǵdarlamalary boiynsha bilim alady.
Magistratýrada ónerkásiptik AI-júieler, qaýipsizdik, ushqyshsyz júieler, biznes-taldaý jáne tsifrlyq quqyq baǵyttary boiynsha bes baǵdarlama iske asyrylyp jatyr.
Ýniversitet kampýsy 3,5 myńnan astam bilim alýshyǵa eseptelgen.
Ýniversitette jeke AI-infraqurylymy bolady
Qazaq AI Research University-degi oqý, ǵylymi-zertteý jáne basqarý úderisteri biryńǵai tsifrlyq ortaǵa biriktirilgen.
Onyń negizin QAIRU OS platformasy quraidy. Júie stýdentterdiń jeke bilim berý traektoriialaryn qalyptastyrýǵa, oqytýshylarǵa oqý úderisin uiymdastyrýǵa jáne zertteýshilerge ǵylymi ádebietter, derekter men esepteý resýrstarymen jumys isteýge múmkindik beredi.
Sonymen qatar ýniversitette NVIDIA H200 negizindegi jeke AI-infraqurylymy damyp keledi. Ol jasandy intellekt modelderin ázirleý, ǵylymi zertteýler júrgizý jáne AI ónimderin jasaý úshin paidalanylmaq.
Ýniversitet janynan irgeli jáne qoldanbaly zertteýlerdi, robototehnika men intellektýaldy júielerdi biriktiretin AI Research Hub qurylady.
Sheteldik ýniversitettermen birlesken baǵdarlamalar iske qosylady
QAIRU halyqaralyq seriktestikti de damytyp jatyr. 2027 jyldan bastap Shanghai Jiao Tong University jáne Tsinghua University-men birlesken qos diplomdy baǵdarlamalardy iske qosý josparlanyp otyr.
Sondai-aq Carnegie Mellon University, Shanghai Innovation Institute, Helsinki ýniversiteti jáne Tsinghua Shenzhen International Graduate School uiymdarymen yntymaqtastyq ornatylǵan.
Google, Huawei jáne Samsung kompaniialarymen birge oqý baǵdarlamalaryna indýstriialyq sertifikattaý baǵdarlamalary engizilýde. NVIDIA-men birlesip NVIDIA Deep Learning Institute óńirlik ortalyǵyn qurý josparlanǵan.
Ýniversitettiń bilim berý modeliniń negizine AI+X qaǵidaty alynǵan. Iaǵni jasandy intellekt salasyndaǵy bilim naqty bir salanyń – mysaly, aýyl sharýashylyǵy, kólik, mashina jasaý nemese bilim berýdiń saraptamasymen ushtastyrylady.
Keleshekte bul modeldi Qazaqstannyń basqa joǵary oqý oryndaryna da taratý josparlanyp otyr. QAIRU jetekshi ýniversitetterdi biriktiretin AI+X konsortsiýmynyń ózegi retinde jumys isteidi.
