Astanada Halyqaralyq jastar kúnine arnalǵan saltanatty is-shara ótti. Elorda tórine elimizdiń barlyq óńirinen 3 myńǵa jýyq belsendi jas jinaldy. Olardyń qatarynda volonterler, ǵalymdar, kásipkerler, jastar uiymdary men jastar resýrstyq ortalyqtarynyń ókilderi, memlekettik qyzmetshiler, qoǵam qairatkerleri, ónerpazdar jáne sportshylar bar.
Qazaqstan Respýblikasynyń Prezidenti jastarǵa arnaiy quttyqtaýyn joldady. Memleket basshysynyń quttyqtaý sózin QR Premer-ministriniń orynbasary – Mádeniet jáne aqparat ministri Aida Balaeva oqyp berdi.
Qasym-Jomart Toqaev jastardyń qoǵamdy alǵa bastaityn qozǵaýshy kúsh ári jasampaz ideialardyń qainar kózi ekenin atap ótti. Búginde Qazaqstan jastary halyqaralyq deńgeidegi bilim jáne ǵylym baiqaýlarynda, sport saiystarynda top jaryp, Kók Týymyzdy biikte jelbiretip júr.
«Jastardy qoldaý saiasaty memleketimiz úshin árdaiym negizgi basymdyq bolyp qala beredi. Qazirgi tańda respýblikamyzdyń ár aimaǵynda kóptegen mektepter, sport nysandary, damý ortalyqtary salynyp jatyr. Aýqymdy jobalar qolǵa alynyp, daryndy jastarǵa jan-jaqty qoldaý kórsetilýde.
Búgin tabystalatyn «Táýelsizdik urpaqtary» granty – sonyń jarqyn kórinisi. «Júzden – júirik, myńnan – tulpardy» anyqtaityn úzdikter saiysy ozyq oily, otanshyl, bilimdi ári eńbekqor azamattardyń basyn qosyp otyr.
Qasterli Otanymyzdyń bolashaǵy – Sizderdiń qoldaryńyzda!
Qazir elimizde barlyq salada túbegeili reformalar jasalyp jatyr. Halqymyz jalpyulttyq referendýmda biraýyzdan qabyldaǵan jańa Konstitýtsiia elimizdegi aýqymdy ózgeristerge tyń serpin berdi, Qazaqstannyń odan ári ósip-órkendeýine jol ashty.
Ata Zańymyzda adam kapitalyn, bilim men ǵylymdy, innovatsiiany damytý strategiialyq baǵyt retinde aiqyndaldy. Sonymen qatar, bas qujatta alǵash ret volonterlik qyzmetke memleket tarapynan qoldaý kórsetiletini naqty jazyldy. Osylaisha, biz qoǵamda órkenietti ultqa tán jańa etikany ornyqtyryp, «Taza Qazaqstan», «Adal azamat» qaǵidattaryn ult sanasyna sińire bastadyq.
Qazaqstan bedeli joǵary memleket retinde damýdyń dańǵyl jolyna túsip, tarihi órleý kezeńine qadam basty. Elimiz jappai tsifrlandyrý isin qarqyndy júrgizip, jasandy intellekt tehnologiialaryn barlyq salaǵa belsendi engizip jatyr. Túptep kelgende, bizdiń maqsatymyz – ekonomikasy quatty, Zań men Tártip ústemdik etetin, Ádiletti, Ozyq, Qaýipsiz ári Taza Qazaqstandy qurý.
Jańashyldyqqa umtylǵan, igi bastamalardyń bel ortasynda júrgen jalynda jastar kez-kelgen belesti baǵyndyra alady.
Men buǵan kámil senemin! Barshańyzǵa tabys tileimin! Joldaryńyz ashyq bolsyn! Qasterli Otanymyz – Qazaqstan kórkeie bersin!», – delingen Prezident quttyqtaýynda.
Sondai-aq is-shara aiasynda «Táýelsizdik urpaqtary» granttar baiqaýynyń jeńimpazdaryn marapattaý rásimi ótti. Saltanatty is-shara merekelik kontsertpen qorytyndylandy.
