Dúniejúzilik Toǵyzqumalaq qaýymdastyǵy ulttyq ziiatkerlik oiyndy jańa deńgeige shyǵarýǵa baǵyttalǵan 9Qum tsifrlyq platformasyn iske qosty. Joba toǵyzqumalaq áýesqoilary, kásibi sportshylar, jattyqtyrýshylar men tóreshilerge arnalǵan.
Platformada qoldanýshylar jasandy intellektpen túrli deńgeide oinap, partiialaryn taldap, qateleri men tiimdi júrister týraly tolyq saraptama ala alady. Sonymen qatar debiýttik jáne taktikalyq pozitsiialardy zertteýge, jattyqtyrýshymen birlesip daiyndalýǵa, álemniń kez kelgen núktesindegi qarsylaspen onlain oinaýǵa jáne beinebailanys arqyly partiia ótkizýge múmkindik bar.
Sondai-aq júie onlain týrnirler uiymdastyrýdy jeńildetip, jarystardyń ótý barysy men nátijelerin naqty ýaqyt rejiminde baqylaýǵa jaǵdai jasaidy. Jankúierler úzdik oiynshylardyń kezdesýlerin tikelei efirden nemese jazba arqyly kóre alady. Budan bólek, platformada toǵyzqumalaqqa arnalǵan oqýlyqtar men ǵylymi eńbekterdi satyp alýǵa bolatyn onlain kitap dúkeni jumys isteidi.
Dúniejúzilik Toǵyzqumalaq qaýymdastyǵynyń málimetinshe, platforma iske qosylǵan alǵashqy úsh kúnde oǵan shamamen 1400 sportshy tirkelip, 9 myńǵa jýyq partiia oinalǵan. Osy ýaqyt ishinde eki onlain týrnir ótkizilip, oǵan 300-ge jýyq sportshy qatysqan.
Qaýymdastyq aldaǵy ýaqytta platformada respýblikalyq jáne halyqaralyq týrnirlerdi turaqty ótkizýdi, reitingtik júieni jetildirýdi, jasandy intellekttiń taldaý múmkindikterin keńeitýdi jáne toǵyzqumalaqty álemde keńinen nasihattaýdy josparlap otyr.
