6 qazanda Zaporojege jasalǵan zymyran soqqysynan 11 adam qaza boldy, úiindi astynda qalǵan 21 adam qutqaryldy. Bul jóninde Ýkraina tótenshe jaǵdai memlekettik qyzmeti habarlady.
Vedomstvo málimetinshe, qalada keminde eki turǵyn úi qiraǵan. Birinde úiindi astynan alty adam qutqarylǵan, beseýi aýrýhanaǵa jatqyzylǵan. Sol jerden segiz adamnyń denesi tabylǵan. Qulaǵan ekinshi úiden úsh adamnyń denesi tabylǵan, qutqarylǵan 15 adamnyń segizi aýrýhanaǵa jetkizilgen. Vedomstvo qazir zymyran soqqysynyń saldaryn joiý jumystary júrip jatqanyn habarlady.
Zaporojege zymyran soqqysy 6 qazanda tańerteń jasalǵan. Oblystyń basym bóligi orys kúshteriniń baqylaýynda qalyp otyr. Aimaqtaǵy eki iri qalanyń biri Zaporojeni orys armiiasy basyp ala almady.
Resei jaǵy zymyran soqqysyna túsinikteme bergen joq. Máskeý Ýkrainanyń azamattyq nysandaryna soqqy jasaǵanyn áli kúnge deiin moiyndamai keledi. Azamattyq nysandardy qiratý halyqaralyq normada áskeri qylmys sanalady.
3 qazanda BUU Resei Ýkrainaǵa basyp kirgeli qaza bolǵan beibit azamattardyń sany 6114-ke jetkenin habarlaǵan. Uiym derek tym tómendetip kórsetilgen bolýy múmkin jáne jii jańaryp jatyr dep eskertedi.
