Májilistiń burynǵy depýtaty Baqytjan Bazarbek óz qatysýymen bolǵan jol-kólik oqiǵasyna qatysty pikir bildirdi. Ol qazir oqiǵa boiynsha sotqa deiingi tergep-tekserý júrip jatqanyn aitty, dep habarlaidy ult.kz.
Bazarbektiń sózinshe, tergeý aiasynda qajetti saraptamalar júrgizilýi kerek. Ol ózi jáne jubaiy tergep-tekserý derekterin jariia etpeý týraly qolhat bergenin atap ótti.
«Meniń qatysýymmen bolǵan jol-kólik oqiǵasyna qatysty kóptegen boljamdar men túrli áńgimelerge jaýap bere almaimyn. Tergeý amaldary jalǵasyp jatyr. Tergep-tekserý organdary zań talaptaryna sáikes bolǵan oqiǵanyń barlyq mán-jaiyna obektivti ári ádil baǵa beredi dep senemin», – dedi eks-depýtat.
Baqytjan Bazarbek úshin qazirgi tańda eń mańyzdysy – jol apatynan zardap shekken azamattyń densaýlyǵy ekenin aitty.
«Qazir men úshin eń bastysy – zardap shekken azamattyń ózine, jaqyndary men týystaryna qoldaý kórsetip, qajetti kómek berý. Biz birneshe kún boiy onyń týǵan-týystarymen birge saýyǵyp ketýin tilep otyrmyz», – dedi ol.
Eks-depýtat zardap shekken azamatqa shuǵyl meditsinalyq kómek kórsetken dárigerlerge alǵysyn bildirdi. Sondai-aq áleýmettik jelilerde taraǵan túrli aqparatqa bailanysty jurtshylyqty asyǵys qorytyndy jasamaýǵa shaqyrdy.
«Barshańyzdy asyǵys qorytyndy jasamaýǵa jáne tek resmi aqparat pen tergeý nátijelerine senýge shaqyramyn», – dedi Bazarbek.
Eske salaiyq, jol-kólik oqiǵasy Jambyl oblysy Turar Rysqulov aýdanyndaǵy «Batys Eýropa – Batys Qytai» halyqaralyq avtojolynda bolǵan. Aldyn ala málimet boiynsha, jolda jeńil avtokólik siyrdy qaǵyp ketken. Keiin birneshe adam janýardy joldyń júris bóliginen alyp tastaýǵa tyrysqan.
Osy kezde Baqytjan Bazarbek tizgindegen Toyota RAV4 avtokóligi jolda turǵan 36 jastaǵy er adamdy qaǵyp ketken.
Jaiaý júrginshi aýyr jaraqat alyp, Turar Rysqulov aýdandyq ortalyq aýrýhanasynyń jansaqtaý bólimine jetkizilgen. Dárigerler onyń jaǵdaiyn óte aýyr dep baǵalaǵan.
Qazir oqiǵanyń barlyq mán-jaiyn anyqtaý úshin sotqa deiingi tergep-tekserý júrgizilip jatyr.
