Foto: Polisia.kz
Pavlodar oblysy politsiia departamentiniń uiymdasqan qylmysqa qarsy kúres basqarmasynyń qyzmetkerleri “Brakoner” jedel-profilaktikalyq is-sharasyn ótkizý barysynda 515 keli zańsyz aýlanǵan balyq pen 2,5 tonna Artemiia-salina shaianyn tárkiledi, – dep habarlaidy Polisia.kz.
Portal málimetinshe, Pavlodar qalasynda 35 jastaǵy jergilikti turǵynnyń basqarýymen Mitsubishi Montero Sport avtokóligi toqtatyldy. Avto salonyn qaraý kezinde jedel qyzmetkerler jalpy salmaǵy 515 keli bolatyn 23 qap balyq (móńke, sazan) taýyp alyp, tárkiledi. Júrgizýshide balyq aýlaýǵa ruqsat beretin qujattar bolǵan joq. Anyqtalǵandai, turǵyn Pavlodar oblysyndaǵy kólderdiń birinde balyqty zańsyz aýlaǵan.
Basqa jaǵdaida, 3 qyrkúiekte reidtik is-sharalar barysynda politseiler Pavlodar qalasynyń turǵynyn ustaǵan, onyń GAZel kóliginen jalpy salmaǵy 2,5 tonnadan asatyn 53 qap Artemiia-salina shaiany tabylǵan.
"Osy faktiler boiynsha Qazaqstan Respýblikasy QK-niń 335-baby (Balyq resýrstaryn, basqa da sý janýarlaryn nemese ósimdikterin zańsyz óndirý) boiynsha sotqa deiingi tergep-tekserý bastaldy. Tiisti saraptamalar taǵaiyndaldy, olardyń nátijeleri boiynsha memleketke keltirilgen zalal anyqtalady", – dedi Pavlodar oblysy PD uiymdasqan qylmysqa qarsy kúres basqarmasynyń bastyǵy Ǵabit Qabdrahmanov.
Qazaqstan Respýblikasy Konstitýtsiiasynyń 77-baby 3-tarmaǵynyń 1-tarmaqshasyna, Qazaqstan Respýblikasy Qylmystyq is júrgizý kodeksiniń 19-baby 1-bóligine sáikes adam, onyń kinási sottyń zańdy kúshine engen úkimimen tanylǵanǵa deiin qylmys jasaǵany úshin kináli emes dep esepteledi.
