Qazaqstan Ulttyq banki zańdy tulǵalar úshin banktik shottardan qolma-qol aqshany alý jónindegi talaptardy ózgertti, dep habarlaidy "Ult aqparat".
QR Ulttyq banki Basqarmasynyń sheshimimen búgin bekitilgen «Qolma-qol aqshaǵa ainaldyrýǵa ruqsat berilgen somanyń shekti mólsherin belgileý týraly qaǵidalar» 2020 jylǵy 1 maýsymnan bastap kúshine enedi.
Qaǵidalar: jeke tulǵalarǵa; jeke kásipkerlerge; mikrokásipkerlik sýbektilerine; aýylsharýashylyq azyq-túlik ónimin, balyq ósirý ónimin satyp alýdy júzege asyratyn zańdy tulǵalarǵa; tamaq ónimderin, sýsyndardy, farmatsevtikalyq, meditsinalyq jáne ortopediia taýarlaryn bólshek saýdasymen ainalysatyn zańdy tulǵalarǵa qoldanylmaidy.
«Ulttyq bank zańdy tulǵalardyń banktik shottardan qolma-qol aqshany alýy úshin myna shekti somany belgileidi: shaǵyn biznes úshin – kúntizbelik aida 20 mln teńge; orta biznes úshin – kúntizbelik aida 120 mln teńge; iri biznes úshin – kúntizbelik aida 150 mln teńge.
Zańdy tulǵalar ekinshi deńgeidegi bankterge tiisti negizdemeni usynǵan kezde belgilengen limitten artyq alýǵa ruqsat beriledi. Óz kezeginde, ekinshi deńgeidegi bankter somany ulǵaitýǵa arnalǵan ótinimdi QR Qarjy ministrliginiń Memlekettik kirister komitetimen 3 jumys kúni ishinde kelisedi», delingen habarlamada.
