Biri bolashaq jaryn uzaq izdegen, endi biri óner qýyp júrip otbasyn qurýǵa asyqpaǵan. Qazaqstandyq tanymal ánshiler men aktrisalar jeke ómirindegi bul sheshimi týraly suhbattarynda ashyq aitqan, dep habarlaidy ult.kz.

Birjan Hasanǵaliev

Ánshi Birjan Hasanǵaliev 33 jasynda úilengen. Óner iesi “BazarLike” baǵdarlamasynda bolashaq jaryn uzaq izdegenin jasyrmaǵan.

“Men negizi kesh úilendim. Bolashaq jarymdy kóp izdedim”, — degen ol.

Suhbatynda ánshi shańyraq kótergen kezde jubaiy Aqmarjannyń 22 jasta bolǵanyn aitqan. Onyń jary meditsina salasynda eńbek etedi. Birjan Hasanǵaliev mýzyka mamandyǵyn meńgerý úshin uzaq jyl oqyǵanyn da osy áńgimede sóz etken. 

Medeý Arynbaev

Medeý Arynbaev ta ónerdiń sońynda júrip, otbasyn qurýǵa keshirek kóńil bólgenin aitqan. Ánshi 31 jasynda shańyraq kótergen.

“Meniń ózim 31 jasymda úilendim. Ándetip júre berippin. Sodan kesh týylǵan balalar”, — degen ol “BazarLike” baǵdarlamasynda.

Óner iesi qatarlastary nemere súiip jatqanda, óziniń uly men qyzy endi erjetkenin áńgimelegen. Balalary týraly aita otyryp, ulyna júregi qalaǵan adam kezdesse, úilenýden qoryqpaýǵa keńes bergenin jetkizgen. 

Gaýhar Álimbekova

Ánshi ári sazger Gaýhar Álimbekova 45 jasynda turmys qurǵan. Bul jańalyǵyn ol “Uiat emes” baǵdarlamasynda bólisken.

Al “Keshki kezdesý” baǵdarlamasynda kópke deiin bar armanyn ánshilikpen bailanystyrǵanyn aitqan.

“Buiyrǵany bolady dep óleńimdi aityp júre berdim”, — degen ánshi.

Óner iesiniń aitýynsha, ol qatarlastaryna qarap asyǵys sheshim qabyldamaǵan. Bolashaq jarymen tanysqannan keiin ekeýiniń qaljyńy jarasyp, birte-birte kóńili aýǵan. 

Kúnsulý Turǵynbekqyzy

Teatr jáne dýbliaj aktrisasy Kúnsulý Turǵynbekqyzy 45 jasynda turmysqa shyqqanyn jurtqa jariialaǵan. Ol 2023 jyly Nege.kz basylymyna bergen suhbatynda otbasyndaǵy ózgeristi ózi rastaǵan.

“Onyń ústine jýyrda turmysqa shyǵyp, otbasyly boldym”, — degen aktrisa.

Kúnsulý jarynyń esimin atamaǵanymen, onyń aqyn ári sazger ekenin aitqan. Sondai-aq jubaiyn ónerdegi synshysy sanaitynyn jetkizgen. Jariialanymda nekesin naqty qai kúni qiǵany kórsetilmegen.

Ásel Sádýaqasova

Aktrisa ári prodiýser Ásel Sádýaqasova 38 jasynda turmysqa shyqqan. Ol nekesin tirkegen sátin áleýmettik jelidegi paraqshasynda jariialaǵan.

“Osymen bitti. 13.06.2023 bizdiń otbasymyzdyń týǵan kúni”, — dep jazǵan óner iesi.

Keiin aktrisa ómirlik serigin kezdestire almai qalýdan qoryqqan kezi bolǵanyn moiyndaǵan. Óz jazbasynda qandai jaǵdai bolsa da qabyldaýǵa bekingennen keiin kóńili jeńildep, ómirin jalǵastyra bergenin aitqan.