2007 jyldary óner álemine qadam basqan Nurjan Qaljannyń juldyzyn jaqqan "Bulbul qusym" ánine qatysty daý shyqty. Bul másele KOREMIZ tok-shoýynda aityldy, - dep habarlaidy Massaget.kz tilshisi.
Baǵdarlama málimetinshe, "Bulbul qusym" ániniń avtory - Qytaidaǵy qazaq Ahmetjan Rabjanuly. Al onyń prodiýseri Erbosyn Nurmuhanuly Nurjan Qaljannyń "Myń bir tún" baǵdarlamasyna bergen suhbatyna qatysty narazylyǵyn bildirgen. Nurjan Qaljan baǵdarlama barysynda bul án balasyndai bolyp ketkenin aitqan.
Al keiinirek án avtorynyń prodiýseri Erbosyn Nurmuhanuly málimdeme jasap, ánshige "Bulbul qusym" onyń balasy emesin aitqan.
"Keshirim surasyn, Nurjandy zań aldynda jaýap berýge mindetteimin", - degen edi prodiýser Erbosyn Nurmuhanuly baǵdarlamada.
Bul ándi alǵashynda án avtory Ahmetjan qytai qazaqtary arasynda oryndap tanylǵan. Al keiinirek Ninety one tobynyń ánshisi ACE laqap atymen tanymal Azamat Qairatulynyń ókilderi bul ándi oryndaý úshin Nurjan Qaljannan ruqsat suraǵan. Al Nurjan Qaljan kelisimin bergen. Bul máseleni ýshyqtyra túsken.
"Bulbul qusym" ániniń Qazaqstanǵa kelýine bir kezderi Nurjan Qaljannyń prodiýseri bolǵan Qydyráli Bolmannyń da qatysy bar eken. Ol da bul jaǵdaidan habardar. Tipti osy máselelerden keiin Nurjan Qaljanǵa onyń bireýge beretindei quqyǵy joǵyn da aitqan. Alaida án saýdaǵa túspegen, alǵashynda avtorlary tegin bergen.
Sondai-aq, Nurjan Qaljan baǵdarlama barysynda Qydyráli Bolmanovtan nege ketkenin aitqan.
"Qydyráli aǵamen arada kelispeýshilikter boldy. Ketýge májbúr boldym. "Aǵa, raqmet sizge, ónerde ortaǵa qostyńyzdar. Biraq óz jolymmen júre bereiin" degen áńgime boldy. Ekeý ara kelispeýshilik boldy. 10 jyl boldy. Aqshanyń, dúnieniń máseleleri. Aramyzda renish boldy. Jaýapqa tartý degen dúnie bolmady", - deidi Nurjan Qaljan suhbat barysynda.
Baǵdarlama aiaǵynda másele sheshimin taýyp, Nurjan Qaljan án avtorynyń prodiýserinen keshirim suraǵan.
