Jambyl oblysynyń Merki aýdanynda 19 jasynda qaitys bolǵan Madinaǵa qatysty jańa málimetter jariialandy, dep habarlaidy ult.kz.
Jan Ahmadiev marqumnyń qaiyn jurtyna bardy. Biraq kelinshektiń enesi suhbat berýden bas tartty. Al marqum áieldiń kúieýin óz úiinen tappady. Jýrnalisttiń sózinshe, kelinshektiń kiim-keshegi men jeke zattaryn da bermei qoiǵan.
Aita keteiik, Jambyl oblysynyń Merki aýdanynda 19 jastaǵy Madina Rashidqyzy qaitys boldy. Jas kelinshektiń artynda segiz ailyq sábii qalǵan. Bul týraly birneshe aqparat quraldary jazdy. Málimet boiynsha, Madina Ózbekstan azamaty bolǵan, al kúieýi Qazaqstan azamaty. Erli-zaiypty shamamen eki jyl nekede turǵan.
Qaiǵyly jaǵdaidyń aldynda Madina jaqyn qurbysyna kúieýimen arada janjal bolǵanyn aityp, ajyrasqysy keletinin jetkizgen. Sondai-aq qurbysynan 15 myń teńge qaryz suraǵan. Alaida qurbysy qajetti aqshany taýyp bere almaǵan.
Kelesi kúni Madinanyń qaitys bolǵany týraly habar taraǵan.
Sonymen qatar áleýmettik jelide marqumnyń buǵan deiin otbasyndaǵy janjaldar týraly qurbysyna aityp júrgeni jazyldy. Kei derekterde kúieýiniń oǵan qol kótergeni týraly málimetter de bar. Alaida bul aqparat ázirge resmi túrde rastalǵan joq. Qazir Madinanyń ólimine qatysty tergeý júrgizilip, oqiǵanyń naqty mán-jaiy men ólim sebebi anyqtalyp jatyr.
