Ońtústik Qazaqstan oblysynda para alyp ustalǵan Jetisai qalasynyń eks-ákimine qatysty sot úkimi shyqty, dep habarlaidy QazAqparat tilshisi.
Maqtaaral aýdandyq sotynyń sýdiasy Seiilhan Musabekovtyń aitýynsha, burynǵy ákim Baidýaly Bazarbaev Qylmystyq kodekstiń 366-baby 2-bóligimen («Para alý») aiypty dep tanyldy. Ol jaza retinde 12 mln teńge aiyppul tóleý mindetteldi.
«Aiyppuldy bir ai merzimde tóleýi tiis sheneýnik búgingi kúnge deiin 4 mln teńgesin tólep qoidy. Qalǵan somany 15 sáýirge deiin tóleýge mindetteldi», - dedi Seiilhan Musabekov.
Eske salaiyq, ótken jyldyń qańtar aiynda Maqtaaral aýdanynyń ortalyǵy Jetisai qalasynda 3,1 mln teńgege zamanaýi úlgidegi qoǵamdyq ájethana salyp, ony saltanatty túrde ashqan Jetisai ákimi Baidýaly Bazarbaev ońtústikqazaqstandyqtar arasynda «tanymaldylyqqa» ie bolǵan edi. Al 2018 jyldyń 20 aqpany kúni ol 200 myń teńge para alý kezinde ustaldy.
Anyqtalǵandai, ákimdik qyzmetkerleri Maqtaaral aýdanyndaǵy jekemenshik balabaqshalardyń birin tekserip barǵanda bala sany qujatta kórsetilgendei 125 emes - 75 bolǵan. Al oǵan ákimdik tarapynan «Balapan» baǵdarlamasy arqyly 125 balaǵa aqsha tólenip kelgen. Osy kemshilikke orai ákimshilik qyzmetkerleri akti toltyryp ketken. Artynsha balabaqsha iesi Jetisai qalasynyń ákimi Baidýaly Bazarbaevqa osy isti jyly jaýyp qoiýdy suranǵan. Buǵan ákim bastapqyda 500 myń teńge suraǵan. Eki tarap «saýdalasyp», aqyrynda 200 myń teńgege kelisken.
Ol kepil retinde quny 13 mln teńge turatyn úiin qoiyp, úiqamaqqa alynǵan bolatyn.
Eks-ákim tergeý barysynda para alǵanyn moiyndady. Sondyqtan qylmystyq is tez arada qaralyp, úkim shyǵaryldy.
