وڭتٷستٸك قازاقستان وبلىسىندا پارا الىپ ۇستالعان جەتٸساي قالاسىنىڭ ەكس-ەكٸمٸنە قاتىستى سوت ٷكٸمٸ شىقتى, دەپ حابارلايدى قازاقپارات تٸلشٸسٸ.
ماقتاارال اۋداندىق سوتىنىڭ سۋدياسى سەيٸلحان مۇسابەكوۆتىڭ ايتۋىنشا, بۇرىنعى ەكٸم بايدۋالى بازارباەۆ قىلمىستىق كودەكستٸڭ 366-بابى 2-بٶلٸگٸمەن («پارا الۋ») ايىپتى دەپ تانىلدى. ول جازا رەتٸندە 12 ملن تەڭگە ايىپپۇل تٶلەۋ مٸندەتتەلدٸ.
«ايىپپۇلدى بٸر اي مەرزٸمدە تٶلەۋٸ تيٸس شەنەۋنٸك بٷگٸنگٸ كٷنگە دەيٸن 4 ملن تەڭگەسٸن تٶلەپ قويدى. قالعان سومانى 15 سەۋٸرگە دەيٸن تٶلەۋگە مٸندەتتەلدٸ», - دەدٸ سەيٸلحان مۇسابەكوۆ.
ەسكە سالايىق, ٶتكەن جىلدىڭ قاڭتار ايىندا ماقتاارال اۋدانىنىڭ ورتالىعى جەتٸساي قالاسىندا 3,1 ملن تەڭگەگە زاماناۋي ٷلگٸدەگٸ قوعامدىق ەجەتحانا سالىپ, ونى سالتاناتتى تٷردە اشقان جەتٸساي ەكٸمٸ بايدۋالى بازارباەۆ وڭتٷستٸكقازاقستاندىقتار اراسىندا «تانىمالدىلىققا» يە بولعان ەدٸ. ال 2018 جىلدىڭ 20 اقپانى كٷنٸ ول 200 مىڭ تەڭگە پارا الۋ كەزٸندە ۇستالدى.
انىقتالعانداي, ەكٸمدٸك قىزمەتكەرلەرٸ ماقتاارال اۋدانىنداعى جەكەمەنشٸك بالاباقشالاردىڭ بٸرٸن تەكسەرٸپ بارعاندا بالا سانى قۇجاتتا كٶرسەتٸلگەندەي 125 ەمەس - 75 بولعان. ال وعان ەكٸمدٸك تاراپىنان «بالاپان» باعدارلاماسى ارقىلى 125 بالاعا اقشا تٶلەنٸپ كەلگەن. وسى كەمشٸلٸككە وراي ەكٸمشٸلٸك قىزمەتكەرلەرٸ اكتٸ تولتىرىپ كەتكەن. ارتىنشا بالاباقشا يەسٸ جەتٸساي قالاسىنىڭ ەكٸمٸ بايدۋالى بازارباەۆقا وسى ٸستٸ جىلى جاۋىپ قويۋدى سۇرانعان. بۇعان ەكٸم باستاپقىدا 500 مىڭ تەڭگە سۇراعان. ەكٸ تاراپ «ساۋدالاسىپ», اقىرىندا 200 مىڭ تەڭگەگە كەلٸسكەن.
ول كەپٸل رەتٸندە قۇنى 13 ملن تەڭگە تۇراتىن ٷيٸن قويىپ, ٷيقاماققا الىنعان بولاتىن.
ەكس-ەكٸم تەرگەۋ بارىسىندا پارا العانىن مويىندادى. سوندىقتان قىلمىستىق ٸس تەز ارادا قارالىپ, ٷكٸم شىعارىلدى.
