Atyraý qalasynda 57 jastaǵy turǵyn áleýmettik jeli arqyly taraǵan shetelde jumysqa ornalastyrý týraly jalǵan habarlandyrýǵa senip, alaiaqtardyń qurbany boldy, dep habarlaidy ult.kz.
Belgisiz tulǵalar jábirlenýshimen bailanysyp, Eýropa elderinde jumysqa ornalastyrý jáne eńbek vizasyn rásimdeý qyzmetin usynǵan. Senimge kirgen alaiaqtar onyń 660 myń teńge kólemindegi qarajatyn dropperlerdiń bank shottaryna aýdartqan.
Alaida Atyraý oblysy politsiia departamenti Kiberqylmysqa qarsy is-qimyl basqarmasynyń jedel ýákili Nurbek Nuǵmanovtyń jedel áreketiniń nátijesinde qarajattyń odan ári qozǵalysy toqtatylyp, tolyq kólemde iesine qaitaryldy.
Quqyq qorǵaý organdary azamattyń qarjylyq shyǵynǵa ushyramaýyna múmkindik berdi.
Politsiia turǵyndarǵa áleýmettik jelidegi kúmándi jumys usynystaryna senbeýge, aqsha aýdarmas buryn aqparatty muqiiat tekserýge jáne jeke derekterdi bógde adamdarǵa bermeýge keńes beredi. Kúdik týyndaǵan jaǵdaida 102 nómirine habarlasý qajet.
