Shyǵys Qazaqstan oblysynda BAQ ókilderiniń saýaldaryna jaýap bergen Ishki ister ministriniń orynbasary Iýrii Ilin sońǵy 10 jylda tabiǵi apat saldarynan búlingen úilerge taldaý jasalǵanyn málimdedi, dep habarlaidy QazAqparat tilshisi.
Ministr orynbasarynyń aitýynsha, elimizde sý qorǵaý aimaǵyna salynǵan úiler sany artyp ketken. Osynyń saldarynan jyl saiyn óńirlerde úilerdi sý basý oqiǵalary jiilep otyr.
«Negizi zań boiynsha sý qorǵaý aimaqtaryna qurylys túspeýi kerek. Zańnyń osy talabyn bosańsytyp alǵan siiaqtymyz. Munyń bir ushynda halyqtyń áleýmettik jaǵdaiy tur. Baspanaly bolý úshin shamasy kelgen jerge úi salady. Ony zańdastyrǵan kezde talapqa sai bolmai, qujaty keri qaitarylady. Biraq olardy kóp jaǵdaida súrip tastamaidy. Sý alǵan úilerdiń kóbi osylai salynǵanyn baiqap júrmiz» - deidi Iýrii Ilin.
Sońǵy 10 jylda Qazaqstan boiynsha 1 700-den astam úi tabiǵi apat saldarynan búlingen eken. Sonyń ishinde 300-400 úi ǵana seismikalyq jaǵynan qaýipsiz aimaqqa salynǵan. Qalǵan úilerdiń barlyǵy seismikalyq tózimsiz aimaqtarda ornalasqan kórinedi. Ondai faktiler Almaty jáne Shyǵys Qazaqstan oblystarynda jii baiqalyp otyr.
Ministrlik ókili bul baǵytta kezeń-kezeńmen jumys júrziletinin atady.
«Sý ańǵarynda salynyp ketken úilerdi kezeń-kezeńmen basqa orynǵa kóshirý kerek. Aiagóz qalasynda dál osy baǵytta jumys júrip jatyr. Sý qorǵaý aimaǵynda turyp, qiraǵan úilerdiń ornyna qaýipsiz aimaqtan baspana berilip jatyr» - dedi Iýrii Ilin.
