Almatyda sýmen jabdyqtaý jáne káriz qyzmeti úshin turǵyndardyń jalpy bereshegi 550 mln teńgeden asty. Bul týraly «Almaty Sý» mekemesiniń ókilderi habarlady.
Kópqabatty úilerdiń turǵyndary shamamen 250 mln teńge, al jeke sektor turǵyndary 300 mln teńgeden astam qaryz bolǵan.
Kommýnaldyq qyzmet aqysyn ár aidyń 25-ine deiin tóleý qajet. 26-synan bastap tólem jasalmaǵan jaǵdaida ósimpul esepteledi.
Bereshek uzaq ýaqyt ótelmese, sý berý shektelýi nemese toqtatylýy múmkin. Sondai-aq qaryz sot arqyly óndirilip, boryshker ósimpul men sot shyǵynyn da óteýge mindetteledi. Sý berýdi shekteýge úsh kún qalǵanda tutynýshyǵa aldyn ala eskertý jasalady.
«Almaty Sý» mekemesi turǵyndarǵa qosymsha shyǵynǵa ushyrap, bereshekti májbúrli túrde óndirip alý sharalaryna jol bermeý úshin tólemdi tekserip, qaryzdy ýaqytyly óteýge keńes beredi.
