Tanymal ánshi Móldir Áýelbekova qazaq estradasynyń belgili ókili Meirambek Bespaevty 50 jas mereitoiymen quttyqtap, shyǵarmashylyq keshinde óner kórsetti. Sondai-aq merekelik keshte Móldir Áýelbekovanyń ákesi oǵan arnaiy shapan jaýyp, aq batasyn berdi, dep habarlaidy ult.kz.
Meirambek Bespaevtyń 50 jasqa tolýyna orai uiymdastyrylǵan mereitoilyq kontsertke ónerdegi áriptesteri men jaqyndary jinaldy. Kesh barysynda ánshiniń shyǵarmashylyǵyna qurmet kórsetilip, júrekjardy tilekter aityldy.
Mereitoilyq keshke qatysqan Móldir Áýelbekova Meirambek Bespaevpen birge sahnaǵa shyǵyp, án shyrqady. Ol kontsertten estelik beinejazbalardy Instagram paraqshasynda jariialap, ónerdegi aǵasyna degen ystyq yqylasyn bildirdi.
“Án aǵam, jan aǵam, mereitoiyńyzben!” – dep jazdy ánshi.
Merekelik keshtiń taǵy bir áserli sáti Móldir Áýelbekovanyń ákesi sahnaǵa shyǵyp, Meirambek Bespaevqa arnaiy tigilgen shapan japqan kezde boldy. Ol ánshige degen qurmetin bildirip, júrekjardy tilegin jetkizdi.
“Qýys úiden qur shyqpa dep, shapan jabaiyn. Aǵańnyń kózindei kórip, kiip júr. Arnaiy saǵan tigilgen”, – dedi ol.
Osylaisha, mereitoi iesine erekshe qurmet kórsetilip, arnaiy syi jasaldy. Shapan jabý rásimi qazaqtyń úlkenge qurmet, kishige izet kórsetý dástúrin aishyqtai tústi.
Móldir Áýelbekova bul áserli sátti de áleýmettik jelidegi oqyrmandarymen bólisti. Jariialanǵan beinejazbada mereitoi iesine kórsetilgen qurmet pen syilastyq kórinis tapqan.
Meirambek Bespaev kim?
Meirambek Bespaev – qazaq estradasynyń tanymal ánshisi, termeshi, akter, “MýzART” tobynyń múshesi jáne Qazaqstannyń eńbek sińirgen qairatkeri. Ol 1976 jyly qarasha aiynda Jambyl oblysynyń Talas aýdanynda dúniege kelgen. Ánshiniń naqty týǵan kúni jóninde derekkózderde aiyrmashylyq bar: Sputnik.kz 7 qarasha dep kórsetse, Tengrinews.kz 8 qarasha dep jazady. Bala kezinen mýzykaǵa qyzyǵýshylyq tanytyp, Taraz qalasyndaǵy Glinka atyndaǵy mýzykalyq mekteptiń qobyz synybynda bilim alǵan. 1989 jyly Almatydaǵy Kúlásh Baiseiitova atyndaǵy mýzykalyq mektepke aýysqan. Keiin T. Júrgenov atyndaǵy óner akademiiasynda akterlik mamandyq boiynsha oqyǵan.
Óner jolyn Súiinbai atyndaǵy filarmoniiada ánshi bolyp bastaǵan. Jas kezinde Altynbek Qorazbaevtyń “Boztorǵai” ánin oryndap, kópshilikke keńinen tanylǵan. Onyń repertýarynda “Kesh jaryq”, “Shash-baýlym”, “Óz elim” siiaqty tanymal shyǵarmalar bar.
Keiin “MýzART” tobynyń quramynda óner kórsetip, qazaq estradasynyń damýyna úles qosty. 2002–2007 jyldary “Qazaqkontsert” uiymynda ánshi bolyp qyzmet atqarǵan. Sonymen qatar “Qoshtasqym kelmeidi”, “Ǵashyq júrek” jáne “Ǵashyq júrek 2” filmderine túsken. Ol “Daryn” memlekettik jastar syilyǵynyń laýreaty atanyp, 2012 jyly Qazaqstannyń eńbek sińirgen qairatkeri qurmetti ataǵyn alǵan. Ánshiniń jubaiy – Marhabat, otbasynda balalary bar.
