Танымал әнші Мөлдір Әуелбекова қазақ эстрадасының белгілі өкілі Мейрамбек Беспаевты 50 жас мерейтойымен құттықтап, шығармашылық кешінде өнер көрсетті. Сондай-ақ мерекелік кеште Мөлдір Әуелбекованың әкесі оған арнайы шапан жауып, ақ батасын берді, деп хабарлайды ult.kz.
Мейрамбек Беспаевтың 50 жасқа толуына орай ұйымдастырылған мерейтойлық концертке өнердегі әріптестері мен жақындары жиналды. Кеш барысында әншінің шығармашылығына құрмет көрсетіліп, жүрекжарды тілектер айтылды.
Мерейтойлық кешке қатысқан Мөлдір Әуелбекова Мейрамбек Беспаевпен бірге сахнаға шығып, ән шырқады. Ол концерттен естелік бейнежазбаларды Instagram парақшасында жариялап, өнердегі ағасына деген ыстық ықыласын білдірді.
“Ән ағам, жан ағам, мерейтойыңызбен!” – деп жазды әнші.
Мерекелік кештің тағы бір әсерлі сәті Мөлдір Әуелбекованың әкесі сахнаға шығып, Мейрамбек Беспаевқа арнайы тігілген шапан жапқан кезде болды. Ол әншіге деген құрметін білдіріп, жүрекжарды тілегін жеткізді.
“Қуыс үйден құр шықпа деп, шапан жабайын. Ағаңның көзіндей көріп, киіп жүр. Арнайы саған тігілген”, – деді ол.
Осылайша, мерейтой иесіне ерекше құрмет көрсетіліп, арнайы сый жасалды. Шапан жабу рәсімі қазақтың үлкенге құрмет, кішіге ізет көрсету дәстүрін айшықтай түсті.
Мөлдір Әуелбекова бұл әсерлі сәтті де әлеуметтік желідегі оқырмандарымен бөлісті. Жарияланған бейнежазбада мерейтой иесіне көрсетілген құрмет пен сыйластық көрініс тапқан.
Мейрамбек Беспаев кім?
Мейрамбек Беспаев – қазақ эстрадасының танымал әншісі, термеші, актер, “МузАРТ” тобының мүшесі және Қазақстанның еңбек сіңірген қайраткері. Ол 1976 жылы қараша айында Жамбыл облысының Талас ауданында дүниеге келген. Әншінің нақты туған күні жөнінде дереккөздерде айырмашылық бар: Sputnik.kz 7 қараша деп көрсетсе, Tengrinews.kz 8 қараша деп жазады. Бала кезінен музыкаға қызығушылық танытып, Тараз қаласындағы Глинка атындағы музыкалық мектептің қобыз сыныбында білім алған. 1989 жылы Алматыдағы Күләш Байсейітова атындағы музыкалық мектепке ауысқан. Кейін Т. Жүргенов атындағы өнер академиясында актерлік мамандық бойынша оқыған.
Өнер жолын Сүйінбай атындағы филармонияда әнші болып бастаған. Жас кезінде Алтынбек Қоразбаевтың “Бозторғай” әнін орындап, көпшілікке кеңінен танылған. Оның репертуарында “Кеш жарық”, “Шаш-баулым”, “Өз елім” сияқты танымал шығармалар бар.
Кейін “МузАРТ” тобының құрамында өнер көрсетіп, қазақ эстрадасының дамуына үлес қосты. 2002–2007 жылдары “Қазақконцерт” ұйымында әнші болып қызмет атқарған. Сонымен қатар “Қоштасқым келмейді”, “Ғашық жүрек” және “Ғашық жүрек 2” фильмдеріне түскен. Ол “Дарын” мемлекеттік жастар сыйлығының лауреаты атанып, 2012 жылы Қазақстанның еңбек сіңірген қайраткері құрметті атағын алған. Әншінің жұбайы – Мархабат, отбасында балалары бар.
