QR Tótenshe jaǵdailar ministri Iýrii Ilin Nur-Sultan qalasy kóshelerin qalyń jaýyn-shashyn kezinde sý basý máselesine qatysty túsinik berdi, dep habarlaidy QazAqparat.
«Qalanyń aýmaǵy, turǵyndary men qurylys sany jyl sanap artyp keledi. Elorda turǵyny retinde qalyń jaýyn-shashyn kezinde syr beretin kárizderdiń jumysyna qatysty shaǵymmen kelisemin. Bizde bar málimetke sáikes, qalalyq ákimdik jaýyn-shashyn kárizderiniń sanyn arttyrý baǵytynda shara qoldanyp jatyr», - dedi Ilin Ortalyq kommýnikatsiialar qyzmeti alańynda ótken baspasóz máslihatynda.
Sondai-aq, ministr qurylys jobasyn josparlaǵan kezde jaýyn-shashyn kárizderi máselesin esten shyǵarmaý kerektigin aitty.
«Bul jerde máseleni sáýletshiler men qurylys kompaniialarynyń aldyna qoiý kerek. Turǵyn úi, ǵimarattardy turǵyzar kezde káriz jelisiniń qalai júretinin aldyn ala josparlaǵan jón. Al eger bizdiń vedomstvonyń jumysyna qatysty máselege kelsek. Sý tasqyny qaýpiniń aldyn alý maqsatynda qala ishinen ótetin Esil ózeniniń arnasy keńeitilip, tereńdetý jumysy júrgizildi», - deidi ol.
