Ystanbul áýejaiynda kóz jumǵan Qazaqstan azamatynyń denesi jýyq arada elge jetkiziledi. Bul jaily QR SIM ǵimaratynda ótken brifing barysynda QR SIM resmi ókili Aibek Smadiiarov málim etti, dep habarlaidy QazAqparat tilshisi.
Eske sala ketsek, Ystanbuldaǵy «Atatúrik» áýejaiynda er adam ekinshi qabattan sekirip, qaza tapqan edi.
«Týystaryna habar berildi. Búgin onyń jubaiy Ystanbul qalasyna ushyp keldi. Qazirgi tańda onyń denesi Ystanbul qalasynyń bir aýrýhanasynda jatyr. Búgin búkil qujat daiyndalyp, jaqyn arada denesi Qazaqstanǵa jetkiziledi. Qalai qulady, nege qulady - ol týraly túrik politsiiasy tergeý júrgizip jatyr. Tergeý nátijesi bolǵan jaǵdaida sizderge habaryn beremiz», - dedi Aibek Smadiiarov.
Qaitys bolǵan kisiniń kim ekenin QR SIM resmi ókili ázirge aita almaitynyn jetkizdi.
«Árbir tulǵanyń jeke aqparaty bolǵandyqtan, ony qazir aita almaimyz. Keiin týystarynyń ózderi aitpasa... Jalpy, ne úshin barǵany belgisiz. 26 qyrkúiek kúni Ystanbul qalasynyń áýejaiyna ushyp kelgen. Resmi túrde shekaradan ótkennen keiin sol áýejai ǵimaratynda 27 qyrkúiek túski 15:30-ǵa deiin júrgen. Sosyn ekinshi qabattan qulap, qaitys bolǵan», - deidi ol.
Aibek Smadiiarov atap ótkendei, Qazaqstannyń Túrkiiadaǵy konsýly qaitys bolǵan kisiniń týystaryna barynsha kómektesip jatyr.
