Halyqaralyq izdeýde júrgen bloger Qaisar Qamzanyń Qazaqstanǵa jetkizilip jatqan bolýy múmkin. Bul týraly jýrnalist Mihail Kozachkov óziniń Telegram-arnasynda jazdy, dep habarlaidy ult.kz.
Kozachkovtyń málimetinshe, oǵan oqyrmandar Vetnamdaǵy Kamran áýejaiynan túsirilgen fotosýretterdi joldaǵan. Jazba avtory sýretterde Qaisar Qamzaǵa uqsas adamnyń Qazaqstanǵa oralyp bara jatqanyn, onyń janyndaǵy er adam Qarjylyq monitoring agenttiginiń (AFM) qyzmetkeri bolýy múmkin ekenin aitqan.
Qaisar Qamza Instagram jelisinde eki millionnan astam oqyrman jinap, keiin zańsyz jarnamadan tabys tapqany, onyń ishinde Qazaqstanda tyiym salynǵan onlain-kazinony jabyq Telegram-arnasy arqyly jarnamalaǵany aitylǵan. Zańsyz kazino sheteldik Pin-Up býkmekerlik brendi arqyly jumys istegenimen, paidalanýshylardy rýletka men basqa da tyiym salynǵan qumar oiyndar usynylǵan saittarǵa baǵyttap otyrǵan. Qaisar Qamza osy úshin qomaqty syiaqy alyp, blogerdiń kriptovaliýtalyq ámiiandarynan shamamen 200 myń AQSh dollary anyqtalǵan. Kozachkov bul shemany áleýmettik jelilerdegi tanymal tulǵalar da jarnamalaǵanyn aitady.
Jazbada qylmystyq shema áshkerelengennen keiin Qaisar Qamzanyń Ońtústik-Shyǵys Aziiaǵa ketkeni, al 2026 jyldyń sáýir aiynda Qazaqstan Bas prokýratýrasynyń suraýy boiynsha Vetnamda ustalǵany aitylǵan.
Sonymen qatar, Kozachkov Pin-Up isi boiynsha Ýkraina azamattary Dmitrii Drýjinsky men Marina Levkovich-Ginzbýrgtiń de halyqaralyq izdeýde júrgenin eske saldy. Tergeý nusqasyna sáikes, olar Qazaqstandaǵy jumysty uiymdastyrǵan. Al býkmekerlik keńse men onlain-kazinonyń túpki benefitsiarlary retinde Resei azamaty Dmitrii Pýnin men Ýkraina azamaty Marina Ilina atalady. Jýrnalistiń jazýynsha, olar Kiprde turaqty turady.
Mihail Kozachkov atalǵan tulǵalar da Qazaqstanda sot aldynda jaýap bere me degen suraq qoiǵan.
Aita keteiik, bul aqparat Mihail Kozachkovtyń Telegram-arnasynda jariialanǵan málimetke negizdelgen. Resmi organdar ázirge Qaisar Qamzanyń Qazaqstanǵa ekstraditsiialanǵany jóninde resmi aqparat taratqan joq.
