Ońtústik Koreiada óndirilgen artilleriialyq snariadtar Vashington men Seýl arasynda jasalǵan erekshe kelisim aiasynda Ýkrainaǵa beriledi. Bul jóninde Aq úidegi derekkózge súiengen Wall Street Journal basylymy jazdy, dep habarlaidy Azattyq.
Gazettiń aqparatyna qaraǵanda, AQSh Ońtústik Koreiadan 155 millimetrlik gaýbitsaǵa arnalǵan 100 myń snariad satyp alady. Mamandardyń aitýynsha, bul birneshe apta qyzý shaiqas júrgizgenge jetedi. Mundai kelisim Kievke qarý-jaraq tasymaldaýdan jariia túrde bas tartqan Seýldiń ustanymyna qaishy kelmeidi. Ońtústik Koreia bir mezette oq-dári qory jyldam sarqylyp bara jatqan odaqtasy AQSh-qa qol ushyn sozyp otyr.
Basylymnyń málimetinshe, eki eldiń qorǵanys ministrleri arasynda kelisim jasalǵan. Buǵan deiin Soltústik Koreianyń Reseige artilleriialyq snariadtar tasymaldaǵany belgili bolǵan. Bul Reseidiń de, AQSh-tyń áskeri-indýstriialyq baza múmkindigi shektelgendiginen habar beredi.
Qyrkúiekte Polsha Ońtústik Koreiamen quny shamamen 6 mlrd dollar bolatyn kelisimge qol qoiyp, qujat aiasynda tank, gaýbitsa, zymyran júielerine qol jetkizgen. Mundai kelisimniń arqasynda Varshava óz armiiasynyń áskeri qýatyn saqtai otyryp, Ýkrainaǵa qarý-jaraq jetkize alady.
Seýl buǵan deiin Ýkrainaǵa oq ótpeitin keýdesheler, kaskalar men dári-dármek jibergen. Reseimen jaqsy qarym-qatynasyn saqtaǵysy kelgen Seýl Kievke qarý-jaraq bermeitinin aitqan.
