QR Syrtqy ister ministriniń birinshi orynbasary Muhtar Tileýberdi Qytaidaǵy qazaq disasporasynyń máselesin talqylaý úshin Úrimjige barady. Bul týraly búgin ol Májilistegi Úkimet saǵatynda aitty, dep habarlaidy QazAqparat.
Aita keterligi, Úkimet saǵaty barysynda Májilis depýtaty Bekbolat Tileýhan Qazaqstanǵa kelip azamattyq ala almai júrgen qandastarymyzdyń jaǵdaiyn aitqan bolatyn.
«Rasynda Bekbolat Qanaiuly kótergen másele oryndy. Tarihi otanyna qaitamyn degen qazaqtar shetelde kóp. Ózderińiz bilesizder, bizdiń taraptan da qoldan kelgenshe jaǵdai jasalyp jatyr. Máselen, byltyr Dúniejúzi qazaqtarynyń quryltaiynda Elbasymyzǵa Qytai qazaqtarǵa qatysty másele aityldy. Olarǵa jeńildikpen azamattyq alý kezinde biraz qujattar qiyndyq týdyrady eken. Elbasymyzdyń tapsyrmasy boiynsha Ishki ister ministrligi sol qujattardan bas tartty, talap etpeitin boldy», - dedi birinshi vitse-ministr.
Degenmen, onyń aitýyna qaraǵanda, búginde bul másele basqa máselege ainalyp shyǵa kelgen.
«Mysaly Qytaidan kelgen qazaqtar jeńildikpen azamattyq alady. Odan keiin Qytai elshiligine baryp tólqujattaryn tapsyratyn. Al Úrimji jaqqa qaityp barǵan kezde olar turaqty tirkeýden shyqpaǵandyqtan qamalyp jatyr. Óitkeni olar turaqty tirkeýden shyqpaǵannan keiin qosymsha áleýmettik tólemder alyp otyr. Jergilikti bilik soǵan tyiym salmaq. Mine osynda máseleler týyndaýda», - dedi ol.
Osy rette vitse-ministr shetelden kelgen qandastarymyzdyń azamattyq alýlaryna jeńildik jasaý máselesin jan-jaqty qarastyrý qajettigin basa aitty.
«Sol eldegi talaptarǵa qaishy kelmeitindei jasaýymyz kerek. Jalpy joǵaryda aitqan máselege qatysty Qytai úkimetimen kelissózder ótkizip jatyrmyz. Men erteń Úrimjige saparlamaqpyn. Sol jaqtaǵy qazaq diasporasy máselesin talqylaý úshin resmi saparmen baramyn», - dedi Muhtar Tileýberdi.
Shetelden kelgen qandastarymyzdyń azamattyq alýyna birqatar jeńildik jasalǵanyn Ishki ister ministri Qalmuhanbet Qasymov da aitty.
«Degenmen, oralman mártbesin alǵannan keiin bir jyldyń ishinde bizge aryz berip, azamattyǵyn alýy kerek. Olar kóbine bir jyldyń ishinde júginbeidi, 15-17 aidan keiin aryz beredi. Sondyqtan biz olardy qaitaramyz. Qazir biz zańǵa ózgerister engizeiin dep jatyrmyz. Sonda aryz berý merzimin uzartyp, jeńildik jasaityn bolamyz», - dedi Qalmuhanbet Qasymov.
