Búgin QR Parlamenti Senatyndaǵy Úkimet saǵatynda QR Ishki ister ministri Qalmuhanbet Qasymov jol-patrýldik politseileri arasyndaǵy jemqorlyqpen kúres sharalary qalai júrip jatqanyn aitty, dep habarlaidy QazAqparat.
«Kez kelgen jaǵdaida jol politsiiasy sheshim qabyldaýy tiis, al biz óz tarapymyzdan qadaǵalaý jasaýymyz kerek. Sondyqtan negizgi is-qimyldarymyzdy baqylaýǵa baǵyttap otyrmyz. Búginde videotirkeýishter men videojetondarǵa kóshtik. Atap aitqanda, qazirgi kezde politsiia qyzmetkeri joldyń boiynda turyp alyp, toqtatpaidy. Iaǵni, tek avtokólikpen sholǵyndaý júzege asyrylady. Mashinada kem degende eki videotirkeýish ornalastyrylǵan, osy oraida biz politseilerlerdiń barlyq is-qimyldaryn baqylaimyz», - dep túsindirdi ministr.
Jyl sońyna deiin barlyq politseilerdi videotirkeýishtermen qamtamasyz etý tapsyrmasy bar ekenin toqtalǵan ol: «Sondyqtan men ózimniń buiryǵymmen politseilerge munsyz júrgizýshilermen jumys isteýge tyiym saldym. Keibir oblystarda kólikter tolyqtai osy qurylǵylarmen qamtylǵan, al qalǵan óńirlerde 30-40 paiyz deńgeiinde ǵana», - dedi.
Sonymen qatar vedomstvonyń ishki qaýipsizdik departamenti de qyzmetkerler arasynda tárbielik ári túsindirý sharalaryn atqaryp jatqanyn atap ótti. «Osy oraida bul jumystardyń barlyǵy jol politseileri arasyndaǵy sybailas jemqorlyq qylmystaryn tómendetýge múmkindik beredi», - dedi Qasymov
