Italiialyq veloshabandoz Djanni Moskon «Astana» komandasynyń quramynda óner kórsetedi. 27 jastaǵy sportshy aldaǵy eki maýsymda (2022 jáne 2023) Qazaqstan komandasynda jarysqa qatysady, dep habarlaidy QazAqparat «Astana» komandasynyń saityna silteme jasap.
«Bir komandada alty jyl ótkergennen keiin mansabymda mańyzdy qadam jasadym. Bul men úshin jańa tájiribe bolmaq. Osy jyldar ishinde úlken tájiribe jinadym, endi ony jańa komandada tolyqtai is júzinde qoldanǵym keledi. «Astanadaǵy» birinshi maýsymymda komandaǵa paidam tiip, tabysqa jetýge tyrysamyn. Joǵary deńgeidegi jarystarda oidaǵydai óner kórsetemin dep úmittenemin. Jańa komandamen, bas menedjer Aleksandr Vinokýrovpen, jattyqtyrýshylarmen jáne sport direktorlarymen jańa maýsymǵa jospar quryp, talqylamaqpyz. Ózimdi kórsetip, jaqsy nátijege qol jetkizemin degen úmittemin», - dedi Djanni Moskon.
Djanni Moskon shabýyldaityn stilimen tanymal. Jastar deńgeiinde joǵary nátije kórsetkennen keiin, 2016 jyly alǵashqy kásibi kelisimshartyna qol qoidy.
2016 jyly italiialyq sportshy «Norvegiianyń Arktikalyq jarysynyń» jalpy esebin jeńip alyp, «Halyqaralyq Koppi-Bartali aptalyǵynyń» jalpy esebinde úshinshi oryndy qanaǵat tutty.
2017 jyly jeke jarysta Italiia chempiony ataǵyna ie bolyp, monýmentaldy «klassikalyq» «Lombardiia týrynda» úshinshi oryn ielendi.
2018 jyly «Djiro della Toskana», «Kopa Agostoni» jáne «Gýansi týrynda» jalpy esepte úshinshi oryn alyp, ulttyq chempion atandy.
2021 jyldyń osy maýsymynda Moskon «Alpy týry» kezeńinde eki ret jeńiske jetip, «Lýgano bas júldesin» jeńip aldy.
