Qazaqstandyqtar Telegram-da vaktsina quramynda magnit bólshekter bar ekeni týraly teoriiany taǵy da taratyp jatyr. Bul joly "dálel" retinde doktor Djein Rýbidiń suhbaty alynǵan. Ol magnit bólshekter vaktsina quramyndaǵy mRNA-ny adam aǵzasyndaǵy jasýshalarǵa "iterý" úshin qajet dep málimdegen, - dep habarlaidy Stopfake.kz.
Portal málimeti boiynsha, shyn máninde Djein Rýbi dáriger emes. Ol ózin densaýlyq saqtaý ekonomisti jáne psihologiia doktory dárejesi bar saiasi sarapshy retinde tanystyrady.
Buǵan deiin ol COVID-19 pandemiiasyna bailanysty jalǵan aqparat taratqany úshin baiqalǵan. Bul joly ol COVID-19-dyń aldyn alýǵa arnalǵan preparattar óndirisinde magnit bólshekter ádeii qoldanatynyn málimdegen. Ol vaktsina alǵan adamdardyń qolyna magnittiń tartylý "qubylysyn" osylai túsindiredi, delingen portalda.
Qazirgi ýaqytta ǵalymdar DNQ vaktsinalaryn óndirýde qoldanýǵa bolatyn sýperparamagnitti nanobólshekterdi zertteýmen ainalysyp jatyr. Alaida DNQ platformasynda jasalǵan birde-bir vaktsina joq. Sonymen qatar, sýperparamagnitti nanobólshekterdi qoldaný tek zertteý satysynda jáne dári-dármek óndirýde qoldanylmaidy.
Portal aqparatyna súiensek, Pfizer/BioNTech jáne Moderna siiaqty mRNQ vaktsinalarynda lipidti nanobólshekter jasýshalarǵa mRNQ-ny jetkizý úshin qoldanylady. Olar magnittik qasietke ie emes jáne aǵzaǵa ziian keltirmesten qysqa ýaqyt ishinde ydyraidy. Basqa vaktsinalarda, sonyń ishinde Qazaqstanda qoldanylatyn ekpelerde magnit bólshekter joq.
