Belgili ánshi Aqbota Kerimbekova 50 jasqa tolǵannan keiin ómirge degen kózqarasy qalai ózgergenin aityp, qazirgi kóńil kúiimen bólisti. Óner iesi bul týraly jýrnalist Ainur Asanberdige bergen suhbatynda aitty, dep habarlaidy ult.kz.

Ánshiniń aitýynsha, keibir qurbylary onyń jasyn ashyq aita beretinin túsinbeidi. Alaida Aqbota Kerimbekova ár jasqa aman-esen jetýdiń ózi úlken baqyt ekenin jetkizdi. Ásirese ómirden erte ótken áriptesterin eske alǵanda, adam ǵumyrynyń qanshalyqty qymbat ekenin tereńirek sezinetinin jasyrmady.
"Bir-eki qurbym bar, "Nege elýge keldim dep aita beresiń?" deidi. Nege aitpaimyn? Elýge jetken de bar, jetpegen de bar. Biraz áriptesterimiz o dúnielik bolyp ketti. Júregiń aýyrady. Bári Allanyń buiyrǵanymen bolady ǵoi. Meniń oiymsha, elýge, alpysqa, jetpiske keldim dep aýyz toltyryp aitý kerek. Ol – Allanyń saǵan bergen nyǵmeti, ǵumyry", – dedi ánshi.
Óner iesi elý jastyń ózindik qyzyǵy men ereksheligi bar ekenin de ázilmen jetkizdi. Onyń sózinshe, bul kezeńde adam ótken ómirine kóz júgirtip, qol jetkizgen jetistikteri men janyndaǵy jaqyndarynyń qadirin burynǵydan da tereń túsine bastaidy.
"Qazir ádemi bir jasqa keldim dep oilaimyn. "Ǵashyq bolaiyn deseń kári siiaqtysyń, óleiin deseń jas siiaqtysyń" degen áńgime bolyp tur ǵoi. Osy kúnge jetkizgenine shúkir. Halyq syilap, qurmettep jatady. Bul – ánshi úshin úlken baqyt", – dep aǵynan jaryldy ol.

Aqbota Kerimbekova búginde ózin ómirine riza, baqytty jan retinde sezinetinin aitty. Ánshi úshin sahnadaǵy tabyspen qatar, ana jáne áje ataný da erekshe qýanysh.
"Qazir elýge kelip, ózimniń baqytty ánshi, baqytty ana, baqytty áje ekenimdi túsinip jatyrmyn", – dedi óner iesi.
Aita keteiik, Ainur Asanberdige bergen suhbatynda Aqbota Kerimbekova jeke ómiri men balalarynyń otbasylyq jaǵdaiy týraly da ashyq áńgimeledi. Sondai-aq kelinderimen qarym-qatynasyna qatysty saýaldarǵa jaýap berdi.
Aqbota Kerimbekova kim?
Aqbota Kerimbekova – qazaq estradasynyń tanymal ánshisi. Ol Shymkent qalasynda dúniege kelgen.
Ónerge bala kezinen jaqyn bolyp, alǵashqy halyq ánderin anasy, ánshi Bibiajar Mahambetovadan úirengen.
"Appaq gúlder", "Qosh, mahabbat", "Begimaidyń jyry" ánderi arqyly kópshilikke tanyldy. Sondai-aq Saiat Medeýovpen birge "Aq shaǵala" ánin oryndaǵan.
2021 jyly Shymkent qalasynyń mádeniet basqarmasy basshysynyń orynbasary qyzmetine taǵaiyndalǵan.