Mádina Sádýaqasova bolashaq jubaiymen telebaǵdarlama túsiriliminde tanysqan. Al Ayree men Nurken Qasymov bir kolledjde oqyp, araǵa jyldar salyp jumys babymen qaita kezdesken. Ult.kz qazaq estradasyndaǵy tórt ánshiniń otbasyn qurý tarihyna sholý jasady.
Erke Esmahan men RaiM
Erke Esmahan RaiM degen atpen tanylǵan ánshi Raiymbek Baqtygereevten 12 jas úlken. Olar 2023 jyldyń qańtarynda nekesin qidyrǵan. Sol kezde Erke 38 jasta, Raiymbek 26 jasta bolǵan.

Erke keiin Instagram paraqshasynda Raiymbekpen 2018 jyly tanysqanyn aityp, sol kúni birge túsken alǵashqy sýretin jariialady. Ánshiniń aitýynsha, bir-birine degen sezimi sol kezdesýden bastalǵan. Ol tanystyqtary jaily áńgimelegende Raiymbektiń “Sham”, “O2” jáne “4 dóńgelek” ánderin de ataǵan.
Mádina Sádýaqasova men Oljas Smaǵulov
“Súigen júrek”, “Juldyzdy tún” ánderimen tanylǵan Mádina Sádýaqasova ózinen jeti jas kishi telerejisser Oljas Smaǵulovpen shańyraq kótergen. Ekeýi telebaǵdarlama túsiriliminde tanysyp, 2013 jyly kezdese bastaǵan. Oljas ánshige týǵan kúninde úilenýge usynys jasaǵan.

Jup 2014 jylǵy 2 aqpanda Almatyda nekesin resmi tirkedi. Úilený toiy da Almatyda ótti. Sol jyldyń jazynda olardyń Ánýar esimdi uly dúniege keldi.
Altynai Jorabaeva men Álisher
Altynai Jorabaeva ekinshi ret turmysqa shyqqanyn 2020 jyly habarlady. Ánshi jubaiy Álisherdiń Qostanai óńirinen ekenin jáne ózinen eki jas kishi ekenin Instagram jelisinde aitty. Sol kezde ol turmysqa shyǵý týraly sheshimdi uzaq oilanyp qabyldaǵanyn, qyzdarynyń da bul qadamyn qoldaǵanyn jetkizdi.

Jorabaeva oqyrmandaryna jubaiynyń minezi týraly da aityp berdi. Onyń sózinshe, Álisher kópshilik aldyna shyǵýǵa qysylady. Sondyqtan ol júzikti el aldynda taǵýdy qalamaǵan.
Ayree men Nurken Qasymov
Ayree degen atpen tanylǵan Áigerim Raqysh ózinen eki jas kishi Nurken Qasymovqa turmysqa shyqqan. Ánshi “Mamskii áńgime” jobasyna bergen suhbatynda ekeýiniń bir kolledjde oqyǵanyn aitty. Oqý bitirgennen keiin árqaisysy óz jolymen ketip, biraz jyldan soń jumys babymen qaita jolyqqan.

Beinebaian túsiretin maman izdegen Áigerim Nurkenniń jumystaryn áleýmettik jeliden qarap júrip, oǵan ózi birinshi bolyp jazǵan. Áýelde shyǵarmashylyq josparlaryn talqylaǵan ekeýi keiin kofe iship, ómir jaily da uzaq áńgimelesetin bolǵan. Ánshi suhbatynda Nurkenniń eńbekqorlyǵy men sabyrly minezin atap ótti.