Kádege jaratý alymyn 2 esege tómendetý naryqtaǵy básekelestikti kúsheitedi. Bul týraly «SemAZ» JShS direktorynyń orynbasary Qydyrolla Jumaǵulov aitty, dep habarlaidy QazAqparat.
«Kez kelgen memleket ishki naryǵyn qorǵaý, otandyq óndirisin qoldaý úshin is-sharalar qabyldaidy. Kádege jaratý alymy qazaqstandyq avtomobil zaýyttarynyń qalyptasýy barysynda naqty rólge ie boldy. Bul jol ónerkásipte, onyń ishinde avtomobil jasaýǵa zor jetistikterge jetken birqatar eldiń tájiribesi negizinde tańdap alynǵan bolatyn. Bastapqyda memleket salaǵa qajetti jaǵdai men qoldaý is-sharalaryn jasap, jan-jaqty kómektesedi. Sodan keiin baryp atalǵan zaýyttar básekelestik ortada jumys isteýge qabiletti bola túsip, memleket qorǵaý is-sharalaryn birtindep tómendetedi. Ýtilalymdy 2 esege tómendetý kásiporyndarymyzdyń jumysyna áser etetindigi sózsiz. Eń aldymen naryqtaǵy básekelestik kúsheiedi. Buǵan qosa, otandyq avtozaýyttar jinaqtap úlgergen óndiris qarqynyń aitarlyqtai joǵary bolýy da kóńilge demeý. Ózderińiz-aq tóreligin aitarsyzdar, osydan 3 jyl buryn Úkimet 5 jyldyń ishinde barlyq úlgidegi 100 myń avtomobil qurastyrý mindetin júktegen edi. Al, otandyq avtoónerkásip 2021 jyldy 92 myń kólik qurastyrýmen aiaqtady. Demek, mejeli tsifrǵa az ǵana qaldy. Munyń ózi karantindegi 2 jylǵa qaramastan qol jetkizilgen jetistik. Basqasha aitar bolsaq, memlekettik qoldaý is-sharalary tiimdiligin berip otyr», - dedi ol.
Osy rette Qydyrolla Jumaǵulov «SemAZ» zaýytyn mysalǵa keltirdi.
«Múmkinshilikterdiń ashylǵanynan kórgennen keiin kásiporyn basshylyǵy óndiristi keńeitý týraly sheshim qabyldady. Osy maqasatta qosymsha óndiris alańy satyp alyndy. Qoldanystaǵy 17 myń sharshy metrge qosymsha taǵy 30 myń sharshy metr aldyq. Bul alańda lokalizatsiiany tereńdetýge múmkindik beretin zamanaýi qural-jabdyqtardy ornatý josparlanǵan. Qazaqstan Úkimeti atynan Indýstriia jáne infraqúrylymdyq damý ministrligi jylda bizge qazaqstandyq qamtýdy tereńdetýge qatysty barynsha joǵary talap qoiyp keledi. Osy maqsatta zaýyt ministrlikpen ónerkásiptik qurastyrý týraly kelisim jasap, onda atalǵan sharttyń bári bekitilgen. Biz úshin lokalizatsiia tek qana qajettilik emes, sonymen birge tiimdilik ekendigin birneshe márte málimdedik. Bul eń aldymen ónimimizdiń ózindik qunyn tómendetedi», - dedi zaýyt direktorynyń orynbasary.
Sonymen qatar ol kadr máselesine de jeke toqtalyp ótti.
«Qazirgi óndiristiń talabyna orai jyl saiyn óńirimizdegi oqý oryndaryna talapty kúsheitip kelemiz. Zaýytqa biliktiligi joǵary jumysshylardyń kelýi óte mańyzdy. Salamyzdy damytý mýltiplikativti áser beredi. Zaýyttarymyzdy kezeń-kezeńmen damytýdyń arqasynda aralas ózge de salalar dami túsedi. Al bul jańa jumys orny, biýdjetke salyq degen sóz», - dedi ol.
Zaýyt direktorynyń orynbasary kádege jaratý alymy tómendegennen keiingi kólik baǵasyna qatysty oiymen de bólisti.
«Ýtilalym tómendegennen keiin avtomobil baǵasy túse me?» dep jii suraidy. Menińshe, baǵa sál ǵana tómen túsýi múmkin. Óitkeni, baǵanyń qalyptasýyna túrli faktor áser etedi jáne ýtilalym mólsheri bul rette negizgi emes. Biz ónimimizdiń qunyna kádege jaratý alymy qosylmaityndyǵyn aityp kelemiz. Avtoóndiristi yntalandyrý baǵdarlamasy ýtilalymdy óteýge múmkindik berdi. Al import arqyly elimizge keletin avtomobilder sál arzandaityn shyǵar. Qanshaǵa? Bul importaýshylarǵa qoiylatyn saýal», - dedi Qydyrolla Jumaǵulov.
