syndai syn sátte ustazdardy kúshtep jumysqa tartyp, onlain-sabaq jazýǵa májbúrlep otyr degen orynsyz másele týyndamaýy tiis. Bul jaiynda QR Bilim jáne ǵylym ministri Sholpan Karinova Facebook paraqshasynda jazdy, dep habarlaidy "Ult aqparat".
«Búgingi kúni koronavirýstyń taralýyna qarsy kúresti kúsheitý kezinde 6 sáýirden bastap mektepter tórtinshi toqsandy qashyqtan oqytý formatynda bastaidy. Qazir balalar kóktemgi demalysta. Muǵalimder bolsa, balalardy jańasha oqytýǵa daiyndyq ústinde. Oqýshylardyń demalysy kezinde muǵalimder buǵan deiin de ózderiniń pedagogikalyq sheberligin arttyrýmen ainalysatyn. Ádistemelik qorjynyn tolyqtyryp, bolashaq sabaǵyna qajetti material qarastyratyn. Búgingi kúni ádettegi daiyndyqqa qosa muǵalimder óz tsifrlyq quziretin kúsheitý boiynsha jumys jasaýy qajet. Qashyqtan jumys jasaýda muǵalimderdiń júielik tájiribesi joq ekenin eskeretin bolsaq, árine, bul ońai sharýa emes jáne bundai jumys buryn talap etilmegen. Desek te, sabaq barysynda muǵalimder tsifrlyq bilim berý resýrstarymen, elektrondy oqýlyqtarmen, elektrondy jýrnal júielerimen buǵan deiin de jumys jasaityn. Bunyń ózi tsiflyq júiede jumys jasaýdyń qandai da bir tájiribesi ekeni anyq», - dep jazady vitse-ministr.
Onyń atap ótýinshe, qazirgi tańda mektep ákimshiligi, ádistemelik birlestik jetekshileri, ustazdar qashyqtyqtan oqytýǵa aýysý baǵytynda belsendi jumys atqarýda. Eń mańyzdysy - osy máseleni durys túsiný. Qashyqtyq sabaq – ádettegidei qyryq minýt kólemindegi sabaq emes. Qashyqtyq sabaqtyń ádis-tásilderi, qaǵidalary da basqa.
«Osyndai syn sátte ustazdardy kúshtep jumysqa tartyp, onlain-sabaq jazýǵa májbúrlep otyr degen orynsyz másele týyndamaýy tiis. Qazirgi jaǵdaida bul - muǵalimniń ózine kerek nárse, bul - muǵalim jumysynyń jańa sharty. Eń bastysy, oqýshylar muǵalimnen qyzyqty, tartymdy sabaq kútedi», - dedi ol.
Osy rette vitse-ministr ata-analardy bul máselege túsinikpen qaraýǵa, balaǵa jańa formatta oqý materialyn igerýge kómek berip, muǵalim men oqýshy arasyndaǵy bailanystyń ornaýyna yqpal etýge, qajetti nátijege jetý úshin kómek berýge shaqyrady.
«Tek osylai, birlese jumys jasaý arqyly biz oqý úrdisin durys uiymdastyryp, balalarǵa qajetti bilim men quziretin bere alamyz. Keibir mektepterde sapaly internet, muǵalimder men oqýshylarda kompiýterdiń bolmaýy, otbasynda birneshe bala bolǵan jaǵdaida kompiýterdi paidalaný máseleri, daiyn internet-platformalardyń joqtyǵy túsinikti. Bul suraqtar, árine, bar, olar jeke turǵyda qarastyrylady, olardy sheshý joldary anyqtalýda», - dedi Sholpan Karinova.
