Almaty taýlarynda 73 jastaǵy Ońtústik Koreia azamaty Cho Kýkhidi izdeý jumystary jetinshi táýlik boiy jalǵasyp jatyr. Qazir izdeý jumystaryna shamamen 90 adam jumyldyrylǵan, dep habarlaidy ult.kz.
Alǵashqy kúnderi joǵalǵan azamatty izdeýge shamamen 50 adam shyqqan. Qazir olardyń qatary eki esege jýyq artqan.
Izdeý jumystaryna Tótenshe jaǵdailar ministrliginiń, politsiianyń, jergilikti atqarýshy organdardyń qyzmetkerleri men eriktiler qatysyp jatyr. Sondai-aq 10 tehnika, 3 kinologiialyq esep, 7 dron jáne TJM aviatsiiasy jumyldyrylǵan.
Qutqarýshylar taýdyń betkeileri, shatqaldar men jaqyn mańdaǵy sý aidyndaryn kezeń-kezeńimen tekserip jatyr. Almaty qalasy TJD málimetinshe, izdeý jumystaryna kúrdeli jer bederi, aýmaqtyń úlkendigi jáne biiktiktiń kúrt ózgerýi kedergi keltirýde.
Týrist taýǵa jalǵyz ketken
«Erikti qutqarý qyzmetiniń» jetekshisi Qarlyǵash Núsirbekovanyń aitýynsha, 28 qyrkúiekte er adam «Shymbulaq» aspaly joly arqyly Talǵar asýy aýmaǵyna kóterilgen.
Shamamen saǵat 11:00-de ol birge júrgen adamdarǵa ári qarai jalǵyz kóterilip, ózi qaityp túsetinin aitqan.
Otbasyna jibergen aqparatyna sáikes, ol «Talǵar asýy – Chimbýlachka shyńy – Talǵar asýy» baǵytymen júrgen. Osydan keiin bailanysqa shyqpaǵan.
Qutqarýshylardyń aitýynsha, joǵalǵan azamattyń taýǵa shyǵý tájiribesi bolǵan. Alaida onyń riýkzagynda tamaq, qajetti qural-jabdyq pen jyly kiim bolǵan-bolmaǵany belgisiz. Sondai-aq jolda baǵytyn ózgertkeni-ózgertpegeni de anyq emes.
Izdeý jumystary er adamnyń tutas qara tústi kiim kigeni sebepti de qiyndap otyr. Mamandar taýǵa shyqqanda ashyq tústi kiim kiiýge keńes beredi. Mundai kiimdegi adamdy dronnan nemese tikushaqtan baiqaý ońaiyraq.
Qutqarýshylar týristerge úndeý jasady
Qarlyǵash Núsirbekova taýǵa shyǵar aldynda marshrýtty, onyń kúrdeliligin jáne qajetti qural-jabdyqtardy aldyn ala zertteý keregin eske saldy.
Jaqyndaryńyzǵa qai baǵytpen júretinińizdi aityp, ásirese jospar ózgergen jaǵdaida, ornalasqan jerińizdi únemi jiberip otyrǵan jón.
Mamannyń aitýynsha, taýdan saǵat 13:00-ge deiin qaitýdy josparlaǵan durys. Sebebi taýda qalaǵa qaraǵanda kún erterek batady jáne adasyp qalý qaýpi joǵary.
«Qazgidromet» málimetinshe, 5 qazanda Almaty taýlarynda jańbyr men qar jaýyp, jeldiń ekpini sekýndyna 25 metrge deiin jetýi múmkin.
Almaty qalasy TJD izdeý jumystary úzdiksiz júrgizilip jatqanyn habarlady.
Oqi otyryńyz: Týrist joǵalsa, izdeý shyǵynyn kim tóleidi? Jýrnalist zańnamany ózgertýdi usyndy
