Semeide internet-alaiaqtyqtan túsken aqshany aýdarý jáne qolma-qol aqshaǵa ainaldyrý úshin alty stýdenttiń bank kartasy paidalanylǵany anyqtaldy. Bir stýdenttiń shotyna ǵana 25 adamnan 16 mln teńgeden astam qarajat túsken, dep habarlaidy ult.kz.
Qarjylyq monitoring agenttiginiń Abai oblysy boiynsha departamentiniń málimetinshe, tergeý barysynda jergilikti ýniversitettiń alty stýdenti anyqtalyp, olardan jaýap alynǵan. QMA málimetinshe, stýdentterge tiesili bank kartalaryna aqsha qabyldanyp, keiin qarajat birneshe bólikke bólinip, basqa shottarǵa aýdarylǵan.
Mundai tásil aqsha qarajatynyń shyǵý tegin jasyryp, qarjy qozǵalysyn baqylaýdy qiyndatqan. Keiin túsken qarajat qolma-qol aqshaǵa ainaldyrylǵan.
QMA anyqtaǵandai, atalǵan shottarǵa aqsha aýdarǵan azamattardyń barlyǵy internet-alaiaqtyq isteri boiynsha jábirlenýshiler bolǵan. Olardyń qatarynda Abai, Qaraǵandy, Aqtóbe, Túrkistan, Atyraý, Batys Qazaqstan, Pavlodar, Aqmola, Jambyl jáne Almaty oblystarynyń, sondai-aq Almaty men Shymkent qalalarynyń turǵyndary bar.
Qazir tergeý jalǵasyp jatyr. Qylmystyq-protsestik kodekstiń 201-babyna sáikes, ózge aqparat jariialanbaidy.
