Úsh jyldyń ishinde mektep kitaphanalarynyń materialdyq-tehnikalyq bazasy jańartylady. Bul týraly QR BǴM «Oqýlyq» Respýblikalyq ǵylymi-praktikalyq ortalyǵynyń direktory Ǵani Beisenbaev málim etti, dep habarlaidy "Ult aqparat".
«Jol kartasynyń negizindegi nátijeler 2021-2025 oqý jyldaryna arnalyp otyr. Bes jyldyń ishinde mektep kitaphanalary túgeldei kórkem ádebiettermen qamtylmaq. Ekinshiden, mektep kitaphanashylarynyń áleýetin kóterý máselesi qolǵa alynyp, 2025 jylǵa qarai tiisti nátije bolady. Óitkeni olardyń biliktiligin kóterýmen qatar, joǵary oqý oryndarynda pedagog-kitaphanashy degen mamandyqty engizgen kezde, 2025 jyly túlekterdiń pedagog-kitaphanashy mamandyǵyn ielenip keletindigi josparlanǵan», - dedi Ǵani Beisenbaev Bilim ministrliginiń apparat jinalysynda.
Onyń aitýynsha, úsh jyldyń ishinde mektep kitaphanalarynyń materialdyq-tehnikalyq bazasyn kóterý aiaqtalady dep josparlanǵan. Búkil zańnamalyq aktiler eki jyl ishinde jańartylyp, ózgerister engiziledi.
