Foto:TJM
Aýyl sharýashylyǵy ministri Aidarbek Saparov sý tasqynynan qyrylǵan mal úshin ótemaqy berý tártibi qandai bolatynyn aityp berdi, dep habarlaidy Ulysmedia.kz.
Algoritm bar
– Tiisti shtab qurylǵan. Ol jaqta tiisti jumystar júrgizilip jatyr. Ár óńirde shtabta veterinarlar bar. Sý tasqynynan 138 800 bas maldy aman alyp qaldyq. Bul óte úlken jumys. Halyq veterinarlarmen, Tótenshe jaǵdai ministrligimen kúsh biriktirip, sonsha maldy aman alyp qaldy. Ólgen maldyń sany 9761 bas. Ólgen maldyń 98 paiyzyna ýtilizatsiia jasadyq, – deidi Saparov Úkimettegi brifing barysynda.
Óteý jaǵyn aitqan ministr tiisti algoritm qurylǵanyn atap ótedi.
– Erejege de kirgizip jatyrmyz. Malynyń bary týraly qaǵaz-qujattary barlarǵa shyǵyn biýdjetten tólenedi. Al qaǵaz-qujaty joq, tirkeýde bolmaǵan mal úshin qarajat qor, demeýshiler arqyly beriledi. 4801 bas úshin tólenip boldy. 1,19 mdrd teńge tólendi, – deidi Saparov.
Algoritmge sáikes, iesiniń rasynda da maly bolǵanyn úsh kýáger rastaýy kerek. Iaǵni, kórshisi, ýchaskelik politsei rastaýy tiis.
Qazaqstandaǵy sý tasqyny
Eske sala keteiik, biyl birneshe óńirdi sý tasyp, ondaǵan aýdanda tótenshe jaǵdai jariialandy. Sý tasqyny eń úlken qaýip týǵyzyp otyrǵan óńirler qatarynda Atyraý, Batys Qazaqstan, Soltústik Qazaqstan, Qostanai oblystary bar. Reseidiń Or qalasynda dambynyń jarylýy qosymsha qiyndyq týǵyzǵan. Qulsary qalasynda eń kúrdeli jaǵdai tirkelip, adam shyǵyny tirkeldi.
Premer-ministr, shtab jetekshisi osy rette Oljas Bektenov jaýaptylarǵa birqatar tapsyrma bergen.
