Qazaqstandyq tanymal ánshi Dimash Qudaibergen Grammy stýdiiasynyń Global Mixtape jobasyna suhbat berip, shyǵarmashylyq ustanymy men aldaǵy josparlary týraly aitty, dep habarlaidy ult.kz.
Jýrnalist Valeri Limen áńgime barysynda óner iesi balalyq shaǵyn eske alyp, mýzykaǵa degen qyzyǵýshylyǵy otbasynan bastalǵanyn jetkizdi. Onyń aitýynsha, ata-anasy kásibi mýzykant bolǵandyqtan, úiinde qazaqtyń halyq ánderimen qatar álemdik klassikalyq týyndylar da jii shyrqalǵan.
Dimash bes jasynan bastap sahnaǵa shyqqanyn, búginde óner jolynda júrgenine 27 jylǵa jýyqtaǵanyn aitty.
Ánshi suhbatta qazaqtyń ulttyq mýzykasyna da erekshe toqtaldy. Ol dombyra men qobyzdyń úni arqyly halqymyzdyń tarihyn, tabiǵatyn jáne dúnietanymyn jetkizýge bolatynyn túsindirdi. Sondai-aq kúi óneri men aitystyń erekshelikterin sheteldik kórermenge tanystyrdy.
Áńgime barysynda Dimashtyń túrli tilde án oryndaýy da sóz boldy. Óner iesi muny sheteldik tyńdarmandardyń Qazaqstanǵa degen qurmetine jaýap retinde qabyldaitynyn aitty.
«Ózge tilderdegi ánderdi úirený – adamdardyń maǵan ǵana emes, mádenietimizge, elimizge kórsetken súiispenshiligi men qurmetine alǵys bildirý tásilim», – dedi ol.
Dimash shyǵarmashylyǵyndaǵy basty maqsaty tabys tabý emes ekenin de ashyq aitty.
«Basty maqsat aqsha tabý emes. Eń mańyzdysy – biz, óz aýditoriiasy bar óner adamdary, halyqqa beibitshilikti, izgilikti, mahabbat pen ózara túsinistikti eske salyp otyrýymyz kerek. Aqsha – ómirimizdegi eń basty qundylyq emes», – dedi ánshi.
Sonymen qatar ol aldaǵy álemdik týryna qatysty josparlarymen bólisti. Dimashtyń aitýynsha, gastroldik sapar 20-dan astam eldi qamtýy múmkin. Ánshi múmkindiginshe kóp memlekette kontsert ótkizip, jankúierlerimen júzdesýdi qalaidy.
Budan bólek, óner iesi jaqyn arada Niý-Iorktegi áigili Madison Square Garden arenasynda ótken kontserti týraly derekti film jariialaýdy josparlap otyrǵanyn jetkizdi. Film onyń YouTube arnasynda jaryq kóredi.
Dimash Qudaibergen aldaǵy ýaqytta da qazaq mádenietin álemge tanystyryp, mýzyka arqyly túrli halyqtardy jaqyndastyrýdy maqsat etetinin atap ótti.
Aita keteiik, buǵan deiin Dimash Qudaibergen «Kitap oqityn ult» respýblikalyq marafonyna qatysatynyn málimdegen edi. Óner iesi osylaisha eldegi kitap oqý mádenietin damytýǵa baǵyttalǵan bastamaǵa qoldaý bildirdi.
Dimash Qudaibergen kim?
Dimash Qudaibergen – qazaqstandyq ánshi, kompozitor jáne álemdik sahnada tanylǵan óner iesi. Onyń tolyq esimi – Dinmuhammed Qanatuly Qudaibergen. Ol 1994 jyly 24 mamyrda Aqtóbe qalasynda dúniege kelgen. Ákesi Qanat Aitbaev pen anasy Svetlana Aitbaeva – Qazaqstanǵa tanymal óner qairatkerleri. Dimash bala kezinen mýzykaǵa qyzyǵyp, bes jasynda alǵash ret sahnaǵa shyqqan. Ol Ahmet Jubanov atyndaǵy Aqtóbe mýzykalyq kolledjinde bilim alǵan. Keiin Qazaq ulttyq óner ýniversitetinde oqýyn jalǵastyryp, kásibi mýzykalyq bilimin jetildirgen. 2015 jyly Belarýstiń Vitebsk qalasynda ótken halyqaralyq "Slavian bazary" baiqaýynda bas júldeni jeńip aldy. Bul jetistik onyń halyqaralyq mýzykalyq mansabyndaǵy mańyzdy belesterdiń biri boldy.
2017 jyly Qytaidaǵy Singer mýzykalyq baiqaýyna qatysyp, ekinshi oryn ielendi.
Sol jyly Astanada "Bastaý" atty alǵashqy aýqymdy jeke kontsertin ótkizdi. Dimashtyń repertýarynda qazaq, orys, aǵylshyn, frantsýz, italian jáne basqa da tilderdegi ánder bar. Ol pop, klassikalyq jáne dástúrli mýzykany úilestirip oryndaidy. Ánshi fortepiano men dombyra sekildi mýzykalyq aspaptarda oinap, ózi de án jazady.
Búginde Dimash Qudaibergen halyqaralyq sahnalarda óner kórsetip, qazaq mýzykasy men mádenietin álemge tanystyryp keledi.
