Úsh áieli, toǵyz balasy bar bloger qarjylyq qiyndyq týraly aityp, synnyń astynda qaldy, dep habarlaidy ult.kz.
Qazaqstandyq bloger Baýyrjan Baqytjanuly áleýmettik jelide otbasynyń qarjylyq jaǵdaiy týraly aitqan málimdemesinen keiin qyzý talqyǵa tústi.
Bloger videolarynyń birinde qazirgi tańda otbasyndaǵy basty másele qarjy tapshylyǵy ekenin aitqan. Bul sózderden keiin jeli qoldanýshylary kóp áiel alǵan er adam óz otbasyn tolyq qamtamasyz etýge mindetti ekenin aityp, synǵa aldy.
Keiin Baýyrjan Baqytjanuly sózderiniń konteksten julynyp alynǵanyn málimdedi. Onyń aitýynsha, balalardyń mektep pen balabaqshaǵa barýyna bailanysty shyǵyndar kóbeiip, otbasy únemdeýge kóshken. Sondai-aq bloger mundai qarjylyq qiyndyq qazirgi ýaqytta kóptegen otbasyna ortaq másele ekenin atap ótti.
Ol ekinshi ret 2017 jyly úilengenin aityp, sol kezde satýshy bolyp jumys istep, kúnine 4000 teńge tabys tapqanyn jáne jaldamaly úide turǵanyn jetkizdi. Blogerdiń sózinshe, ekinshi áiel alýdy alǵash bolyp birinshi jubaiy usynǵan.
