Júsipbek Aimaýytov aýylynan attanǵan «Ulylarǵa taǵzym – urpaqqa amanat» salt atty sapary Jumat Shanin aýylyna at basyn tiredi. Sal-serilik dástúrdi jalǵaýshy topty aýyl ákimi Tańat Saǵyntaev pen aýyl aqsaqaldary qarsy aldy.
Búgingi kúnniń serileri tuńǵysh qazaq teatrynyń negizin qalaýshy Jumat Shanin aýylynda «Alash» partiiasynyń qurylǵanyna 100 jyl tolýyna orai uiymdastyrylǵan merekelik kontsertke qatysty.
Saiahatshylar Jumat Shanin aýylyna barar jolda arnaiy Ánet taýy eteginde ornalasqan Maqash qystaýyna tústi. Qystaý iesi Sútjan Kárimovtyń jol bastaýymen eski meshit orynymen tanysty. «Bul jer Nurǵali molla meshitiniń orny. Nurǵali óz zamanynda Troitsk mediresesin bitirgen bes qazaqtyń biri. HÚIII-HIH ǵasyrlarda Qulboldy-Mailytonnan muǵalim men moldalardyń kóktep shyǵýynyń syry osynda» - dedi osynaý ólkeniń tarihyn jastaiynan tanyp ósken Sútjan Kárimov.
Qystaý mańynda qazaqtyń taǵy bir asyl perzentiniń beiiti ornalasqan. Ekibastuz ataýynyń paida bolýy men áiili kómir kenishiniń ashylýyna tikelei septigi tigen geolog Qosym Pishenbaev osy qystaý mańynda jerlengen.
Maqash qystaýynan asa bere Áýliebulaqtan sýsynyn qandarǵan jolashylarǵa, atty sapar basshysy Oral Rahmashuly osy mańnyń syryn baian etti: «Bul jer bizdiń atalarymyz Aqbýra Qarqynbai myrzanyń qonysy bolǵan. Osy mańda «Qarqanbaidyń sabasyn» bilmeitin qazaq joq. Shoń bi Súiindiktiń atynan Qarakesek Qonysbaiǵa as beredi. Sol asta qonaqtardy qymyzben qamtýdy bizdiń atamyzǵa júkteidi. Tórt qula aiǵyrdyń terisinen jasalǵan sabanyń jan jaǵynan kerege tartylyp, kiiz úi qurylǵan eken. Sol sabany úsh atty jigit turyp pisetin kórinedi. As barysynda qymyz bir sát te úzilmei jetip turǵan. Meiramnyń bes balasyna túgeldei jetti deitin kórinedi el. Sabany toltyrý úshin 300 bie saýylǵan».
Jumat Shanin dúniege kelgen Shana qazirgi ýaqytta Qaraǵandy oblysynyń aýmaǵyna ótip kese de, rejisser atyndaǵy aýyl dara darynnnyń esimin eleýsiz qaldyrmaǵyn. Meimandardy aq kóńilimen aq tósep qarsy alǵan jurttyń kóńili shat-shadyman. Saqasyn iirip shýyldasyp turǵan top bala kózge tústi birden. Aýyl balalarynyń ulttyq oiyndy dáriptep, boiyna sińirip jatqany janymyzdy jadyratty.
Mektep ataýy da aqyn, «Alashtyń» arda azamaty Qoshke Kemeńgerovtyń esimin ielengen. Osynaý óńirde sýyryp salma aqyndar Qobylan Bóribaiuly, Tiyshtyǵul Manabaiuly, «ándi erttep, kúidi mingen» ánshiler Jarylǵapberdi Jumabaiuly, Qali Baijanov dúniege kelgen. Osyndai perzentterdiń mekeninde halyq kompozitorlarnyń ánderi áýeledi.
Kezdesý sońynda atty sherý músheleri Baian óńiriniń giminine ainalǵan «Baianaýyl valsin» shyrqady. «Almatydan alysta bolsa daǵy, Alataýdan aýmaityn» óńirdiń perzentterine taǵzym etip júrgen top Jaiaý Musa aýylyna jol tartty.
Arnaiy Ult portaly úshin Jumat Shanin aýylynan Elaman QABDILÁShIM
