Ulybritaniiadan Qazaqstan tarihyna qatysty qundy qoljazbalar men qujattar tabyldy, dep habarlaidy "Ult aqparat" Mádeniet jáne aqparat ministrligine silteme jasap.
Qoljazbalar jáne sirek kitaptar ulttyq ortalyǵynyń mamandary Ulybritaniiadaǵy ǵylymi-zertteý ekspeditsiiasy aiasynda QR SIM qoldaýymen London, Oksford jáne Manchester qalalaryndaǵy kitaphanalar men arhivterge, ǵylymi ortalyqtarǵa bardy. Mamandar 15 qoljazba men 500-ge jýyq arhiv qujatynyń kóshirmesin aldy.
Manchester qalasynan tabylǵan qundy qoljazbalardyń biri - shamamen X-XII ǵasyrlarda alǵash túrki tiline aýdarylǵan qasietti Quran kitaby. Túrki tilindegi aýdarmasy Júsip Balasaǵunidiń "Qutty bilik" tiline óte jaqyn. Kitaptyń túrki-islam mádenieti úshin mańyzy zor.
Sondai-aq, mańyzdy qoljazbalardyń biri - arab tilinde bibliografiialyq baǵytta jazylǵan ortaǵasyrlyq eńbek. "Kitáb maqalaat ár - Rafiia fii ýsýl ilm at-tabiia" (Tabiǵat ǵylymynyń negizderi jaily joǵary maqalalar kitaby) kitabynda Ábý Nasyr ál - Farabidiń ómirbaiany men qoljazbalary týraly málimetter bar. Eýropalyq zertteýshi ǵalym Karl Brokkelman óz eńbeginde qoljazba ál-Farabige tiesili ekenin atap kórsetken.
Qazaqstandyq mamandardy Oksfordtyń Bodlian kitaphanasynan HI ǵasyrdaǵy parsy tarihshysy Ábý Said Abd-ál-Haii-Gardizidiń "Zein ál-ahbar" eńbegi qyzyqtyrdy. Qoljazba 1049-1053 jyldar aralyǵynda jazylǵan. Eńbekte 1032 jylǵa deiingi parsy (islamǵa deiingi) patshalardyń, Muhammed pen halifalardyń, sondai-aq Horasannyń 1041 jylǵa deiingi tarihy qamtylǵan. Úndistan, Aziianyń túrki taipalary, orystar, grekter arasyndaǵy ǵylym, din, merekeler týraly taraýlar bar. Bul qoljazbanyń úzindilerin V.V. Bartold "Mońǵol shapqynshylyǵy dáýirindegi Túrkistan" jáne "1893-1894 jyldardaǵy Orta Aziiaǵa sapar týraly esep" eńbekterinde qoldanǵan.
Ulttyq ortalyqtyń qyzmetkerleri men sheteldik ǵalymdar qoljazbalar men basqa da eńbekterge birlesken zertteýler júrgizýdi josparlap otyr.
