Astanada Qazaqstan Respýblikasy Mádeniet jáne aqparat ministrliginiń qoldaýymen «Kreativti indýstriialardy damytý qory» korporativtik qory júzege asyrǵan «Ulttyq qolóner mektebi» bilim berý jobasynyń qorytyndy is-sharasy ótti.
27 shilde men 12 tamyz aralyǵynda Qazaqstannyń ulttyq qolóner salasyndaǵy 10 úzdik sheber 8-20 jas aralyǵyndaǵy 208 qatysýshyǵa dástúrli qolónerdiń tehnologiialary men qyr-syryn úiretti.
Qazaqstan Respýblikasy Premer-ministriniń orynbasary – Mádeniet jáne aqparat ministri Aida Balaeva qatysýshylardy jobanyń sátti aiaqtalýymen quttyqtady. Ol tálimger sheberlerge, uiymdastyrýshylarǵa, ata-analarǵa jáne barlyq qatysýshylarǵa alǵys bildirdi.
Úkimet basshysynyń orynbasary búginde dizain, sán, sáýlet, týrizm jáne kreativti indýstriialardyń ózge de baǵyttarynda ulttyq naqyshqa degen qyzyǵýshylyq artyp kele jatqanyn atap ótti. Onyń aitýynsha, bul úrdis sheberlerge de, jastarǵa da jańa múmkindikterge jol ashady.
«Memleket basshysy ulttyq qundylyqtar men tarihi-mádeni murany saqtaýǵa, shyǵarmashyl jastardy qoldaýǵa jáne kreativti indýstriialardy damytýǵa erekshe nazar aýdaryp keledi. Qolóner – halqymyzdyń ǵasyrlar boiy qalyptasqan turmys-tirshiligin, dúnietanymy men kórkem talǵamyn tanytatyn asyl qazyna. Sondyqtan ulttyq qolónerdi saqtaý jekelegen buiymdardy jinaqtap, kórmege qoiýmen ǵana shektelmeidi. Onyń eń senimdi joly – ónerdiń qyr-syryn sheberden shákirtke úiretip, urpaqtar sabaqtastyǵyn jalǵaý. «Ulttyq qolóner mektebi» jobasy osy mańyzdy mindetke naqty úles qosyp otyr. Endigi mańyzdy mindet – dástúrli qolónerdi saqtap qana qoimai, oǵan zamanaýi dem berý. Dástúr ótkenniń jádigeri bolyp qalmai, qazirgi damýdyń qýatty resýrsyna ainalýy kerek», – dedi Aida Balaeva.
Joba qatysýshylary ulttyq qolónerdiń 10 baǵyty boiynsha tájiribelik bilim aldy. Oqý baǵdarlamasyna zergerlik óner, aǵash pen teri óńdeý, kiiz basý, qysh óneri, kilem toqý, súiek oiý jáne dástúrli qoldanbaly ónerdiń ózge de túrleri engizildi.
«Ulttyq qolóner mektebi» aiasynda inkliýzivti bilim berýge de erekshe kóńil bólindi. Erekshe bilim berý qajettilikteri bar balalar úshin arnaiy top uiymdastyrylyp, sabaqtar olardyń shyǵarmashylyq qabiletin ashýǵa, usaq motorikasyn jetildirýge jáne praktikalyq eńbek daǵdylaryn qalyptastyrýǵa baǵyttaldy.
Qorytyndy is-shara barysynda tálimger sheberler men joba túlekterine sertifikattar tabystalyp, olardyń avtorlyq jumystary tanystyryldy. Sondai-aq bilim berý baǵdarlamasynyń qorytyndysy shyǵaryldy.
Aita keteiik, jobaǵa qatysýǵa 450-den astam ótinim kelip tústi. Konkýrstyq irikteý nátijesinde 208 qatysýshy tegin bilim alý múmkindigine ie boldy. Tálimger sheberlerdi irikteý de úlken qyzyǵýshylyq týǵyzdy. Elimizdiń barlyq óńirinen 331 ótinim qabyldanyp, tehnikalyq irikteýden ótken 271 ótinimdi konkýrstyq komissiia qarady. Nátijesinde Qazaqstannyń ulttyq qolóner salasyndaǵy 10 úzdik sheber tańdaldy.
«Ulttyq qolóner mektebi» ulttyq mádeni murany saqtap, ony jas urpaqqa sabaqtastyqpen jetkizýge, dástúrli qolónerdi keńinen dáripteýge jáne ony zamanaýi kreativti indýstriianyń mańyzdy baǵyttarynyń biri retinde damytýǵa arnalǵan.
Joba balalar men jastardyń shyǵarmashylyq áleýetin ashýǵa, ulttyq ónerge qyzyǵýshylyǵyn arttyrýǵa jáne bolashaq kreativti indýstriia ókilderi úshin jańa múmkindikter qalyptastyrýǵa jaǵdai jasaidy.
